ក្រុមអ្នកសិក្សាស្រាវជ្រាវ និងអ្នកជំនាញរបស់អង្គការ WWF រួមជាមួយក្រុមអ្នកអភិរក្សជីវចម្រុះ BINCO និងក្រុមអ្នកជំនាញបច្ចេកវិទ្យាដ្រូននៃម៉ាស៊ីនថតប្រើកម្ដៅ និងអាជ្ញាធរមូលដ្ឋាន បានសហការគ្នាសិក្សាសត្វព្រៃនៃខេត្តក្រចេះ។​ ក្នុងកិច្ចសហការនេះ ក្រុម​អ្នកស្រាវជ្រាវសង្កេតឃើញរបាយការណ៍សត្វក្តាន់នៅភូមិសាស្រ្តខេត្តក្រចេះ តាមរយៈវីដេអូឯកសារ និងរូបថតចេញពីម៉ាស៊ីនថតស្វ័យប្រវត្តិ ដែលចេញដោយអង្គការWWF។ វត្តមាន និងសកម្មភាពរបស់សត្វក្ដាន់នេះ បាន​ផ្ដល់ភាពរីករាយដល់ក្រុម​អ្នកស្រាវជ្រាវ និង​អ្នក​អភិរក្ស។


 

«លទ្ធផលនៃការស្រាវជ្រាវក៏បានបង្ហាញពីវត្តមាននៃសត្វក្តាន់វ័យជំទង់ និងកូនជាច្រើន។ វត្តមានរបស់ពួកវា បានបង្ហាញពីការបន្តពូជជាបន្តបន្ទាប់នៅក្នុងតំបន់ព្រៃធម្មជាតិ។ ជាមួយគ្នានេះ ក្រសួងបរិស្ថាន និងអង្គការ WWF កំពុងរៀបចំរបាយការណ៍ស្តីពីស្ថានភាព និងចំនួនសត្វក្តាន់ សម្រាប់ការចេញផ្សាយនាពេលខាងមុខនេះ»។ នេះជាការបញ្ជាក់ដោយ អង្គការ WWF។
 

សត្វក្តាន់ត្រូវបានកំណត់ក្នុងបញ្ជីក្រហមរបស់អង្គការ IUCN ថាជាប្រភេទសត្វរងគ្រោះថ្នាក់ជិតផុតពូជជាសកល។ នៅកម្ពុជា សត្វក្តាន់នេះ ធ្លាប់បានអ្នកវិទ្យាសាស្រ្តប៉ានប្រមាណថាបានផុតពូជទៅហើយរហូតដល់មានការរកឃើញឡើងវិញនៅក្នុងឆ្នាំ ២០០៦ នៅក្នុងខេត្តក្រចេះ។
 

ទោះជាយ៉ាងណាក៏ដោយ សត្វនេះ កំពុងទទួលរងការគំរាមកំហែងដោយការបាត់បង់ទីជម្រក ការបរបាញ់ និងវិបត្តិអន្ទាក់ ដែលបានរាលដាលឡើងដោយការជួញដូរសត្វព្រៃខុសច្បាប់៕