អ្នកនាំពាក្យក្រសួងការបរទេសចិន មានប្រសាសន៍ដូច្នេះថា៖«ព្រះរាជកាយវិការដ៏ល្អប្រពៃរបស់ទ្រង់ទាំងទ្វេ ក្នុងស្ថានការណ៍ដែលចិនជួបគ្រោះទឹកជំនន់នាពេលថ្មីៗនេះ សបញ្ជាក់ឲ្យឃើញពីមិត្តភាពដ៏ជ្រាលជ្រៅរវាងព្រះរាជវង្សានុវង្សកម្ពុជាជាមួយប្រជាជនចិន ព្រមទាំងបង្ហាញឲ្យឃើញពីស្មារតីនៃសហគមន៍រួមរវាងកម្ពុជា-ចិន។ យើង វាយតម្លៃយ៉ាងខ្ពស់ចំពោះព្រះរាជគុណ និងសូមថ្លែងអំណរគុណយ៉ាងជ្រាលជ្រៅដល់ទ្រង់ទាំងទ្វេ»។ 

 

ស្ថានទូតចិនប្រចាំកម្ពុជា បានស្រង់ប្រសាសន៍របស់លោក ចាវ លីចៀន អំពីការថ្លែងអំណរគុណដល់ព្រះមហាក្សត្រ និងព្រះមហាក្សត្រី យកទៅផ្សព្វផ្សាយលើទំព័រហ្វេសប៊ុករបស់ខ្លួន។ 

 

សូមបញ្ជាក់ថា នៅចុងខែមិថុនា ឆ្នាំ២០២២នេះ ចិន បានជួបគ្រោះទឹកជំនន់សាជាថ្មី នៅភាគខាងត្បូងនៃប្រទេស ដោយផ្ទះរាប់ម៉ឺនខ្នង បានរងការខូចខាត ហើយប្រជាជន ក៏មានដល់រាប់ម៉ឺននាក់ដែរ ដែលត្រូវបានជម្លៀសចេញពីលំនៅឋាន។ 

 

ជាការកត់សម្គាល់ ក្នុងពេលកន្លងៗមក ព្រះមហាក្សត្រកម្ពុជា និងព្រះវររាជមាតាជាតិខ្មែរ តែងប្រោសប្រទានព្រះរាជសារចូលរំលែកក្តីទុក្ខលំបាកដល់ថ្នាក់ដឹកនាំចិន ចំពោះការជួបគ្រោះធម្មជាតិ ហើយពេលខ្លះ ព្រះអង្គទាំងទ្វេ បានភ្ជាប់ព្រះរាជអំណោយជាមួយព្រះរាជសារទាំងនោះ។ ដោយឡែក ថ្នាក់ដឹកនាំចិន ក៏តែងបង្ហាញកាយវិការដូចគ្នានេះដែរ ទៅកាន់ព្រះមហាក្សត្រ ព្រះមហាក្សត្រី រួមទាំងថ្នាក់ដឹកនាំកម្ពុជា នៅពេលកម្ពុជា ជួបគ្រោះធម្មជាតិ ឬការលំបាកណាមួយ៕