អន្តរជាតិ
ក្រុងសៀងហៃ រកឃើញវីរុសបង្កជំងឺកូវីដ-១៩ បំប្លែងខ្លួនថ្មីដែលជាស្រឡាយអូមីក្រុង រូបភាព៖ Xinhua
× ទីក្រុងសៀងហៃ បានរកឃើញវីរុសបង្កជំងឺកូវីដ-១៩ បំប្លែងថ្មីមួយប្រភេទ ដែលជាស្រឡាយអូមីក្រុង (BA.5.2.1)។ មន្ត្រីសុខាភិបាលក្រុងសៀងហៃអះអាងបែបនេះក្នុងសន្និសីទសារព័ត៌មាននៅថ្ងៃទី១០ ខែកក្កដា។
អនុប្រធានគណៈកម្មាការសុខភាពក្រុងសៀងហៃ Zhao Dandan បញ្ជាក់ក្នុងសន្និសីទសារព័ត៌មានថ្ងៃទី១០ ខែកក្កដាថា វីរុសបំប្លែងខ្លួនប្រភេទថ្មី (BA.5.2.1) ត្រូវបានរកឃើញនៅទីក្រុងសៀងហៃ ដែលស្ថិតនៅភាគខាងកើតចិនកាលថ្ងៃទី៨ ខែកក្កដាកន្លងទៅ។ ការរកឃើញនេះធ្វើឡើង ក្រោយមានករណីឆ្លងក្នុងសង្កាត់ Pudong ដោយសារអ្នកជំងឺមានទំនាក់ទំនងនឹងអ្នកជំងឺកូវីដ-១៩ ទើបតែមកពីក្រៅប្រទេស។
ទីក្រុងហិរញ្ញវត្ថុមួយនេះ រកឃើញវីរុសបំប្លែងថ្មីស្រឡាយអូមីក្រុង BA.5 ដែលធ្វើដំណើរពីអ៊ូហ្គង់ដាទៅទីក្រុងសៀងហៃនៅថ្ងៃទី១៣ ខែឧសភា។ នេះបើតាមមជ្ឈមណ្ឌលគ្រប់គ្រងនិងបង្ការជំងឺចិន។
«ទីក្រុងរបស់យើងនាពេលថ្មីៗនេះ បានរាយការណ៍ជាបន្តបន្ទាប់ពីករណីវិជ្ជមានជំងឺកូវីដ-១៩ ហើយហានិភ័យនៃការរីករាលដាលក្នុងប្រទេសក៏នៅមានកម្រិតខ្ពស់»។ លោក Zhao Dandan បានព្រមានបែបនេះ មុនបន្ថែមថា ប្រជាជនក្នុងសង្កាត់មួយចំនួនរបស់សៀងហៃ នឹងត្រូវធ្វើតេស្តរកវីរុសបង្កជំងឺកូវីដ-១៩ ឱ្យបាន២ដង ចាប់ពីថ្ងៃទី១២ ដល់ថ្ងៃទី១៤ ខែកក្កដា ដើម្បីទប់ស្កាត់រលកថ្មីនៃការរីករាលជំងឺកូវីដ-១៩។
បើតាមទីភ្នាក់ថាព័ត៌មាន Reuters សមាជិកក្រុមប្រឹក្សាអ្នកជំនាញការពារជំងឺកូវីដ-១៩ របស់ក្រុងសៀងហៃ Yuan Zhengan អះអាងថា វីរុសបង្កជំងឺកូវីដ-១៩ (BA.5) មានអត្រាឆ្លងលឿន និងមានសមត្ថភាពខ្លាំងដែលធ្វើឱ្យប្រព័ន្ធភាពស៊ាំមនុស្សមិនអាចស្គាល់បាន។ យ៉ាងណាមិញ ការចាក់វ៉ាក់សាំងនៅតែមានប្រសិទ្ធភាពការពារអ្នកឆ្លងវីរុស (BA.5) មិនឱ្យមានស្ថានភាពធ្ងន់ធ្ងរ ឬស្លាប់។ ដូចនេះ ការរកឃើញវីរុសបំប្លែងខ្លួនថ្មីនេះ ទំនងជាធ្វើឱ្យអាជ្ញាធរចិនឈឺក្បាលខ្លាំងទៀត។
ទីក្រុងសៀងហៃមានករណីវិជ្ជមានកូវីដ-១៩ សរុបជាង ៦ម៉ឺនករណីគិតត្រឹមថ្ងៃទី១០ ខែកក្កដា។ ការរកឃើញករណីឆ្លងបង្កដោយវីរុសបំប្លែងថ្មីជាបន្តបន្ទាប់ នឹងក្លាយជាបញ្ហាប្រឈមសម្រាប់ទីក្រុងសៀងហៃក្នុងការបិទខ្ទប់ម្តងទៀត ខណៈទីក្រុងនេះទើបតែបើកនៅដើមខែមិថុនា៕
© រក្សាសិទ្ធិដោយ thmeythmey.com