ភ្នំពេញ៖ លោក ហ៊ុយ យ៉ាឡេង ប្រកាសលក់ផ្ទះក្នុងតម្លៃ ១៣៥,០០០ដុល្លារ ដើម្បីយកប្រាក់សងថ្លៃដើម នៃការផលិតកុនលើកមុន ហើយសល់ប៉ុន្មានយកទៅផលិតកុនបន្ត។ លោកថាតម្លៃផ្ទះនោះ គឺនៅក្រោមទីផ្សារ។ មិនត្រឹមតែលក់ផ្ទះទេ លោក យ៉ាឡេង ក៏លក់ឡានរបស់លោកដែរ។
ចាហ្វាងផលិតកម្ម កថាជ័យភាពយន្ត លោក ហ៊ុយ យ៉ាឡេង បានប្រាប់សារព័ត៌មានថ្មីៗថា ផ្ទះដែលលោកលក់នោះមានទំហំ១៥.៦x១២.៥ និងទំហំផ្ទៃដី ១៨.៨x១៦.១ ហើយលោកលក់ក្នុងតម្លៃ១៣៥,០០០ដុល្លារ។ លោក យ៉ាឡេង អះអាងថា ផ្ទះនោះលោកទិញក្នុងអំឡុងឆ្នាំ២០២១ ដោយបង់រំលោះជាមួយធនាគារ។ មិនត្រឹមតែលក់ផ្ទះប៉ុណ្ណោះទេ ផលិតកររូបនេះ ក៏លក់ឡានរបស់លោកផងដែរ ។ លោកបានបញ្ជាក់ថា ឡាននោះប្រៀបបាននឹងផ្ទះតូចមួយ អាចឱ្យលោកសម្រាកពេលយប់បាន ហើយវាបានដឹកលោកទៅគ្រប់ទិសទី។
«បើខ្ញុំសងគេរួចរាល់ ហើយនៅសល់ប្រាក់គួរសម ខ្ញុំនឹងយកទៅផលិតកុនបែប Action funny។ ប៉ុន្តែបើប្រាក់នៅលក់តិច ខ្ញុំនឹងផលិតរឿងបែបជីវិតទៀត។ ខ្ញុំមិនទាន់ផលិតរឿងខ្មោចទេ។ ផ្ទះនេះខ្ញុំលក់ក្រោមទីផ្សារទេ ព្រោះខ្ញុំទាល់អត់មានលុយសងគេ ហើយខ្ញុំនៅតែចង់ផលិតរឿងត»។ នេះជាការបញ្ជាក់របស់លោក ហ៊ុយ យ៉ាឡេង។
រូបពីហ្វេសប៊ុក Huy Yaleng
នៅលើហ្វេសប៊ុករបស់ផលិតករ ហ៊ុយ យ៉ាឡេង បានរៀបរាប់ថា លោកបានដួលអស់រយៈពេល២ឆ្នាំ ព្រោះតែជំងឺកូវីដ-១៩។ ការណ៍នោះបានធ្វើឱ្យលោក ខ្វះទុនផលិតកុន។ ការខ្វះខាតនេះ បានជំរុញឱ្យលោក យ៉ាឡេង ទៅខ្ចីប្រាក់ពីក្រុមហ៊ុនមួយ ចំនួន៣ម៉ឺនដុល្លារ ដោយសន្យាសងថ្លៃដើម និងជូនប្រាក់ចំណេញទៅវិញ ១៥ពាន់ដុល្លារ។ ហើយលោកបន្តទៅខ្ចីពីក្រុមហ៊ុនមួយទៀត ចំនួន១ម៉ឺនដុល្លារ ដោយសន្យាថានឹងផ្ដល់ប្រាក់ចំណេញ៥ពាន់ដុល្លារទៅវិញ។ លោកបន្ថែមទៀតថា ក្ដីរំពឹងទុករបស់លោក គឺខុសស្រឡះ។
បើទោះបីជាលោក ហ៊ុយ យ៉ាឡេង មិនបានបញ្ជាក់ឈ្មោះភាពយន្តដែលលោកខាតក៏ពិតមែន ប៉ុន្តែក៏គង់គេអាចដឹងបានថា សំណេរដែលលោកបានសរសេរនោះ គឺចង់សំដៅដល់រឿង “គ្រោះជីវិតកូវីដ-១៩”ដែរ។
លោក យ៉ាឡេង ថា ទីផ្សារមើលភាពយន្តក្នុងរោងកុន មានតែនៅរាជធានីភ្នំពេញប៉ុណ្ណោះ ប្រសិនបើផលិតករហ៊ានផលិតរឿង ចាយទុនលើស១០ម៉ឺនដុល្លារ ប្រាកដជាខាតជាមិនខាន។ ប៉ុន្តែប្រសិនបើលោកមានប្រាក់២០ទៅ៣០ម៉ឺនដុល្លារ លោកជឿជាក់ថារឿងរបស់លោក ប្រាកដជាមានគុណភាពខ្ពស់ ហើយអាចយកទៅចាក់បញ្ចាំងនៅក្រៅប្រទេសបាន។
រូបពីហ្វេសប៊ុក Huy Yaleng
លោក យ៉ាឡេង ក៏បានបញ្ជាក់ដែរថា មានក្រុមហ៊ុនមួយ បានសុំទិញរឿង “គ្រោះជីវិតកូវីដ-១៩" ក្នុងតម្លៃ៦ម៉ឺនដុល្លារ។ ប៉ុន្តែដោយសារសំទុះនៃការគាំទ្រខ្សោយ ក្រុមហ៊ុននោះក៏សុំនិរាករកិច្ចសន្យាទិញរឿងវិញ។ ថ្លៃដើមក្នុងការផលិតរឿង”គ្រោះជីវិតកូវីដ-១៩” អស់៨ម៉ឺនដុល្លារ។ ថ្ងៃចាក់បញ្ចាំងរឿងនេះលើកដំបូង ទទួលបានប្រាក់មកវិញត្រឹមតែ៦ពាន់ដុល្លារប៉ុណ្ណោះ។
ទោះជាយ៉ាងណាក៏ដោយលោក យ៉ាឡេង ធ្លាប់ប្រាប់សារព័ត៌មានថ្មីៗកាលពីពេលកន្លងទៅថា លោកមានក្ដីស្រមៃចង់ឱ្យកុនខ្មែរ មានគុណភាពនិងល្បីល្បាញដូចសម័យសង្គមរាស្ត្រនិយម។ បើទោះបីជា លោកធ្លាប់រងការខាតដើមក្នុងវិស័យភាពយន្តក៏ដោយ ក៏លោកមិនបោះបង់វិស័យនេះដែរ។ លោក យ៉ាងឡេង អះអាងថាក៏ព្រោះតែក្ដីស្រឡាញ់។
លោក ហ៊ុយ យ៉ាឡេង ដែលជាចាហ្វាងផលិតកម្ម កថាជ័យភាពយន្ត ធ្លាប់ទទួលបានការគាំទ្រខ្លាំង ក្នុងស្នាដៃដឹកនាំរឿង “ដើមចេកជ្វា” “ធ្មប់” វិកលចរិត”និងរឿង “ដើម្បីកូន” ជាដើម ហើយរឿងទាំងនោះ ខ្លះលោកគ្រាន់តែជាអ្នកដឹកនាំរឿង ខ្លះលោកជាអ្នកនិពន្ធផង ជាអ្នកដឹកនាំផង ក៏ជាតួសម្ដែងឯកក្នុងរឿងនោះផងដែរ៕