ដោយ៖ ហៀក ឆក

 

 

កីឡាករ ជិន ពិសិដ្ឋ និង ម៉េត សុភត្រា្ត ឈ្នះមេដាយមាសវិញ្ញាសាការសម្តែងកាំបិតធំការពារខ្លួន ជាលក្ខណៈគូ នៅក្នុងព្រឹត្តិការណ៍ស៊ីហ្គេម លើកទី៣១ ប្រទេសវៀតណាម។ ពួកគេទាំងពីរ បានប្រឹងប្រែងហ្វឹកហាត់ ដោយភ្ជាប់ជាមួយក្តីរំពឹងថា នឹងអាចឈ្នះមេដាយមាសជូនជាតិម្ដងទៀត នាស៊ីហ្គេមលើកទី៣២ ឆ្នាំ២០២៣ ដែលកម្ពុជា ធ្វើជាម្ចាស់ផ្ទះ។

 

«នៅក្នុងព្រឹត្តិការណ៍ស៊ីហ្គេម២០២៣ជាលើកទី៣២ដែលកម្ពុជាធ្វើជាម្ចាស់ផ្ទះ ពួកយើងបានរៀបចំគោលការណ៍ និងទិសដៅដើម្បីហ្វឹកហាត់ទ្វេរដង ខ្លាំងជាងព្រឹត្តិការណ៍លើកទី៣១ទៀត ដើម្បីយើងដណ្តើមមេដាយឲ្យបានច្រើនក្នុងព្រឹត្តិការណ៍នោះ ព្រោះយើងជាម្ចាស់ផ្ទះជាលើកដំបូង»។ កីឡាករម៉េត សុភ័ត្រា បញ្ជាក់យ៉ាងដូច្នេះ។

 

 

សម្រាប់កីឡាករ ប្រាក់ សុវណ្ណនី និង លី បូរ៉ាមី ដែលបានជួយក្រុមឈ្នះមេដាយមាសលើវិញ្ញាសារសម្ដែងការពារខ្លួន បុរស៣នាក់ និងនារី១នាក់នោះ ក៏មានការតាំងចិត្តខ្ពស់ក្នុងការដណ្ដើមមេដាយមាសជូនជាតិដែរ។ លី បូរ៉ាមី ដែលចាកចេញពីសមាជិកក្រុមសម្តែងការពារខ្លួនបុរស៣នាក់ និងនារី១ ដោយសារបញ្ហារបួសជើង នាការប្រកួតស៊ីហ្គេមនៅវៀតណាម កំពុងប្រឹងប្រែងហ្វឹកហាត់ឱ្យសមត្ថភាពដូចដើមវិញ ឬកាន់តែល្អជាងមុន។ សម្រាប់ការប្រកួតស៊ីហ្គេមលើកទី៣២ ខាងមុខ បូរ៉ាមី នឹងចូលរួមប្រកួតកីឡាវ៉ូវីណា លើវិញ្ញាសារឯកត្តជនវិញ។

 

គួរំឭកដែរថា កីឡាវ៉ូវីណាមទទួលបានមេដាយមាស៣ ប្រាក់២ និងសំរិទ្ធ៩គ្រឿង ក្នុងព្រឹត្តិការណ៍ស៊ីហ្គេមលើកទី៣១ នាប្រទេសវៀតណាម ។ សហព័ន្ធកីឡាវ៉ូវីណាម ដាក់គោលដៅយកមេដាយមាស ៩គ្រឿង នៅស៊ីហ្គេមលើកទី៣២ នាឆ្នាំ២០២៣ ដែលកម្ពុជាធ្វើជាម្ចាស់ផ្ទះ៕