កីឡាជាតិ
ជាតិ
ពានសម្តេច ហ៊ុន សែន៖ អាស៊ីអឺរ៉ុបឡើងទៅវគ្គ១៦ក្រុម ក្រោយឈ្នះហ្គាឡាក់ស៊ី ៣-០ អាស៊ីអ៊ឺរ៉ុបយូណាយធីត អបអរបន្ទាប់ពីរកគ្រាប់បាល់លើ ភ្នំពេញហ្គាឡាក់ស៊ី រូបពីក្លិបអាស៊ីអ៊ឺរ៉ុបយូណាយធីត
× ក្រុមសរុបចំនួន៨ហើយ ដែលត្រូវឡើងបន្តទៅកាន់វគ្គ១៦ក្រុមចុងក្រោយជាមួយ៨ក្រុមផ្សេងទៀតនៅខេមបូឌានព្រីមៀរលីគ សម្រាប់ការប្រកួតពានរង្វាន់សម្តេច ហ៊ុន សែន លើកទី១៦។ អាស៊ីអឺរ៉ុបយូណាយធីត ជាក្រុមចុងក្រោយ បន្ទាប់ពីពួកគេទទួលបានជ័យជម្នះ ៣-០ លើភ្នំពេញហ្គាឡាក់ស៊ី នៅទីលាន AEU Sport Park កាលពីថ្ងៃទី២០ ខែកក្កដា។
អាស៊ីអឺរ៉ុបយូណាយធីត ជាក្រុមមួយក្នុងចំណោម៨ក្រុម បានកៅអីទៅវគ្គ១៦ក្រុមចុងក្រោយ នៃការប្រកួតពានសម្ដេច ហ៊ុន សែន លើកទី១៦ វគ្គជម្រុះថ្នាក់ជាតិ។ បន្ទាប់ពីពន្យាពេល ដោយមានកីឡាករជាប់ប្រកួត AFF U-19 Championship អាស៊ីអ៊ឺរ៉ុប បានយកឈ្នះ ភ្នំពេញហ្គាឡាក់ស៊ី ក្នុងលទ្ធផល ៣-០ នៅទីលាន AEU Sport Park។
ពានសម្ដេច ហ៊ុន សែន លើកទី១៦ ឆ្នាំ ២០២២ ចែកចេញជា ៣ដំណាក់កាល។ ដំណាក់កាលដំបូងជម្រុះថ្នាក់ខេត្តដែលមាន ១៧ ក្រុមមកពី ២៥ រាជធានី-ខេត្ត។ ដំណាក់កាលទី២ ក្រុមដែលទទួលបានចំណាត់ថ្នាក់ពីលេខ១ ដល់លេខ៤ ពីការប្រកួតថ្នាក់ខេត្ត ត្រូវឡើងទៅជួបក្រុម Cambodian League 2 ដើម្បីចម្រាញ់យកក្រុមខ្លាំងចំនួន ៦ក្រុម ដោយឡែកក្រុមអគ្គិសនីកម្ពុជា និងនគរបាលជាតិ មានសិទ្ធិឡើងទៅប្រកួតវគ្គ១៦ក្រុមចុងក្រោយ(ថ្នាក់ជាតិ)រួចជាស្រេច ក្នុងនាមជាក្រុមលេខ១ និងលេខ២ នៃក្របខណ្ឌ Cambodian League 2 គិតត្រឹមសប្តាហ៍ទី០៧។
ការប្រជែងយកបាល់រវាងកីឡាករ ភ្នំពេញហ្គាឡាក់ស៊ី និងអាស៊ីអ៊ឺរ៉ុប រូបពីក្លិបអាស៊ីអ៊ឺរ៉ុបយូណាយធីត
៨ក្រុម ដែលឡើងទៅវគ្គជម្រុះ១៦ក្រុមចុងក្រោយនោះ មានសូលទីឡូអង្គ, សៀមរាបអេហ្វស៊ី, អាយ អេស អាយ ដង្កោសែនជ័យ, កោះកុងអេហ្វស៊ី, ព្រៃវែង, នគរបាលជាតិ, អគ្គីសនីកម្ពុជា និង អាស៊ីអ៊ឺរ៉ុបយូណាយធីត។
សម្រាប់វគ្គ១៦ក្រុមចុងក្រោយ សូលទីឡូអង្គរ ត្រូវប្រកួតជាមួយ ព្រះខ័នរាជស្វាយរៀង, សៀមរាបអេហ្វស៊ី ប៉ះ វិសាខា, អាយ អេស អាយ ដង្កោសែនជ័យ ជួប បឹងកេត, កោះកុងអេហ្វស៊ី ប្រកួតជាមួយ អង្គរថាយហ្គឺរ, ព្រែវែងអែហ្វស៊ី ជួប ភ្នំពេញក្រោន, នគរបាលជាតិ ប៉ះ កងយោធពលខេមរភូមិន្ទ, អគ្គិសនីកម្ពុជា ជួប គិរីវង់សុខសែនជ័យ និង អាស៊ីអ៊ឺរ៉ុបយូណាយធីត ត្រូវប្រកួតជាមួយ ណាហ្គាវើលដ៍៕
Tag:
បាល់ទាត់
ពានសម្ដេច ហ៊ុន សែន
© រក្សាសិទ្ធិដោយ thmeythmey.com