លោក សួង ហេង រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំកិច្ចប្រជុំត្រៀមរៀបចំពិធីសន្និបាតបោះឆ្នោតជ្រើសរើសប្រធាន និងសមាជិកសហព័ន្ធខ្មែរកីឡាហែលទឹកអាណត្តិទី៧ ឆ្នាំ២០២១-២០២៥ ដោយមានការចូលរួមពីថ្នាក់ដឹកនាំក្រសួងមានលោក ហែម គិរី អគ្គលេខាធិការសហព័ន្ធខ្មែរកីឡាហែលទឹក និងមន្ត្រីជំនាញពាក់ព័ន្ធ។
 

ក្នុងកិច្ចប្រជុំនាព្រឹកថ្ងៃទី២១ កក្កដានេះ លោករដ្ឋលេខាធិការ បានជំរុញឱ្យអង្គប្រជុំទាំងអស់ផ្ដល់មតិយោបល់ ក៏ដូចជាធាតុចូល ដើម្បីធ្វើឱ្យការរៀបចំសន្និបាតបោះឆ្នោតជ្រើសរើសប្រធាន និងសមាជិកសហព័ន្ធខ្មែរកីឡាហែលទឹកអាណត្តិទី៧ ប្រព្រឹត្តទៅដោយរលូនតាមការគ្រោងទុក។
 

ការរៀបចំសន្និបាតបោះឆ្នោតជ្រើសរើសប្រធាន និងសមាជិកសហព័ន្ធខ្មែរកីឡាហែលទឹកអាណត្តិទី៧ នឹងធ្វើឡើងនៅថ្ងៃទី២២ ខែកក្កដា នៅទីស្តីការសាធារណការ និងដឹកជញ្ជូន។ លោក ហែម គិរី អគ្គលេខាធិការសហព័ន្ធខ្មែរកីឡាហែលទឹក ប្រាប់សារព័ត៌មានថ្មីៗតាមទូរសព្ទថា បាទ!ថ្ងៃស្អែកនឹងមានការរៀបចំបោះឆ្នោតជ្រើសរើស តែសម្រាប់ថ្ងៃនេះមិនទាន់មានអ្វីទេ ថ្ងៃស្អែកការបោះឆ្នោតចប់បានដឹង»។
 

បច្ចុប្បន្នលោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន កាន់តួនាទីជាប្រធានសហព័ន្ធខ្មែរកីឡាហែលទឹកនេះ។ លោកបានកាន់តួនាទី អស់៣អាណត្តិមកហើយ៕