ស្របពេលដែលព្រឹត្តិការណ៍កីឡាអាស៊ីអាគ្នេយ៍ឆ្នាំ២០២៣ ចូលមកដល់នាខែឧសភា ខាងមុខនេះ សហព័ន្ធកីឡាលើកទម្ងន់កម្ពុជា បានអញ្ជើញក្រុមប្រឹក្សាប្រតិបត្តិពីររូប និងប្រតិភូបច្ចេកទេសមកកម្ពុជា ដើម្បីពិនិត្យ និងវាយតម្លៃចំពោះ ទីតាំងរៀបចំព្រឹត្តិការណ៍កីឡាស៊ីហ្គេមលើកទី៣២។
 

លោក Tom Liaw ក្រុមប្រឹក្សាប្រតិបត្តិ IWF  និងជាអនុប្រធានទី១ SEAWF និងលោក Phetkasem Latarporn ក្រុមប្រឹក្សាប្រតិបត្តិ TAWA រួមមានអ្នកជំនាញកីឡាលើកទម្ងន់ប្រទេសថៃនោះ មានគោលដៅជួយពង្រឹងសមត្ថភាពសហព័ន្ធ សម្រាប់រៀបចំព្រឹត្តិការណ៍កីឡាស៊ីហ្គេមលើកទី៣២ ដើម្បីធានាឱ្យព្រឹត្តិការណ៍ប្រវត្តិសាស្រ្តនៅកម្ពុជាមួយនេះ ប្រកបដោយភាពរលូន។

 ទីតាំងរៀបចំកីឡាលើកទម្ងន់ នាព្រឹត្តិការណ៍ស៊ីហ្គេមលើកទី៣២ នៅអូតែលសុខា និងទីតាំងហ្វឹកហាត់នៅពហុកីឡដ្ឋានមរតកតេជោ។ លោកសំ សុខយី អគ្គលេខាធិការសហព័ន្ធកីឡាលើកទម្ងន់កម្ពុជា ប្រាប់សារព័ត៌មានថ្មីៗយ៉ាងដូច្នេះថា៖ «ទីតាំងហ្នឹងគាត់ថាល្អហើយ ហើយគាត់មើលពីស្ថានភាពយើងធ្វើនៅក្នុងអូតែលសុខាគឺកន្លែងដែលល្អ»។ 
 

គួបញ្ជាក់ថា លោក Tom Liaw ក្រុមប្រឹក្សាប្រតិបត្តិ IWF  និងជាអនុប្រធានទី១ SEAWF ហើយក៏ជាប្រធានបច្ចេកទេសកីឡាលើកទម្ងន់ ត្រូវបានជាប់ឆ្នោតក្នុងអាណត្តិ២០២២-២០២៤នេះ។ លោក Tom Liaw ជនជាតិសិង្ហបុរី និងលោក Phetkasem Latarporn ក្រុមប្រឹក្សាប្រតិបត្តិ TAWA ជាជនជាតិថៃ នឹងត្រលប់ទៅកាន់ប្រទេសខ្លួនវិញ នៅថ្ងៃទី២២ ខែកក្កដា ឆ្នាំ២០២២៕