អ្នកនាំពាក្យកងទ័ពទី៨របស់កោះតៃវ៉ាន់លោក Lou Woei-jye បានប្រាប់ទីភ្នាក់ងារព័ត៌មាន AFP ថា កងកម្លាំងក្រុងតៃប៉ិបានធ្វើសមយុទ្ធបាញ់កាំភ្លើងធំ howitzers និងបាញ់អណ្ដាតភ្លើងនៅព្រឹកថ្ងៃទី១១ ខែសីហា។ សមយុទ្ធនេះ ធ្វើឡើងនៅតំបន់ Pingtung នៅភាគខាងត្បូងប្រទេស ដែលបាន​ចាប់ផ្ដើម​ពី​ម៉ោង៨និង៣០នាទីព្រឹកនៅតៃវ៉ាន់ ហើយបានបញ្ចប់ក្នុងរយៈពេលមួយម៉ោង។

 

«ពួកយើងមានគោលដៅពីរសម្រាប់សមយុទ្ធនេះ។ ទីមួយ គឺដើម្បីបញ្ជាក់ស្ថានភាពដំណើរការត្រឹមត្រូវ​នៃកាំភ្លើងធំនិងលក្ខខណ្ឌថែទាំ និងទីពីរគឺដើម្បីផ្ទៀងនឹងលទ្ធផលសមយុទ្ធកាលពីឆ្នាំមុន»។ លោក Lou ក៏បានសង្កត់ធ្ងន់បែបនេះដោយចង់សម្ដៅលើការសមយុទ្ធនេះ ជាសមយុទ្ធប្រចាំឆ្នាំ​ដែលមិន​មែន​ធ្វើឡើងភ្លាមៗក្នុងការឆ្លើយតបនឹងសមយុទ្ធចិននោះឡើយ។

 

សមយុទ្ធខាងលើនេះបានធ្វើឡើងបន្ទាប់ពីចិនបានបញ្ចប់សមយុទ្ធរបស់ខ្លួនចុងក្រោយដ៏ធំបំផុតមួយ​នៅថ្ងៃទី១០ ខែសីហា។ ក្រុងប៉េកាំងបានបញ្ជាក់ក្នុងសេចក្ដីប្រកាសមួយថា កងកម្លាំងរបស់ខ្លួន​បាន​បំពេញកិច្ចការផ្សេងៗដោយជោគជ័យនៅច្រកសមុទ្រតៃវ៉ាន់ ខណៈប្តេជ្ញាបន្តល្បាត​ជុំវិញ​ដែន​ទឹក​របស់​ខ្លួន។ បុន្តែក្រុងប៉េកាំងក៏អះអាងថា នឹងបន្ត​អនុវត្ត​ការ​ហ្វឹកហ្វឺន​យោធា និង​ត្រៀម​ខ្លួន​សម្រាប់​សង្គ្រាម​ដែរ៕