លោក ទេព រិនដារ៉ូ  ជាសិល្បករមួយរូបដែលបានប្រឡូកការងារក្នុងអាជីពសម្តែងជាមួយលោក រិទ្ធ សារី។ ជុំវិញនៃការស្លាប់របស់លោក រិទ្ធ សារី បានបន្សល់នូវអនុស្សាវរីយ៍ដ៏កម្សត់កម្រ និងភាពជាគូដ៏ល្អក្នុងការបំពេញការងារដល់សិល្បករដទៃ ជាពិសេសម្រាប់លោក ទេព រិនដារ៉ូ នៅក្នុងអាជីពជាតារាសម្តែងនេះ​។ 
 

 

លោក ទេព រិន​ដារ៉ូ បាននិយាយដូច្នេះ៖​« ខ្ញុំធ្លាប់ប្រឡូកការងារកម្សត់កម្រជាមួយគាត់តាំងពីដើមមក។ គាត់ដូចជាឪខ្ញុំម្នាក់ដែរ! ទៅណាមកណា គាត់តែងតែនឹកខ្ញុំ គាត់ស្រលាញ់ខ្ញុំណាស់ ហើយគាត់តែងធ្វើឱ្យពួកខ្ញុំសើចសប្បាយពេលចុះថតសម្តែងជាមួយគាត់ម្តងៗ»។ លោក រិនដារ៉ូ  បន្តលើកឡើងថា លោក រិទ្ធ សារី ជាតារាមួយរូបដែលគោរពពេលវេលា និងឱ្យតម្លៃលើតម្លៃលើការងារ​។  

 

លោក រិទ្ធ សារី ជាអតីតតារាភាពយន្ត ​មាន​ជំនាញ​ល្ខោន​បាសាក់ អាយ៉ៃរឿង និងលេង​​កំប្លែង។ ក្នុង​វិស័យ​ល្ខោន​បាសាក់​ ទស្សនិកជន​ស្គាល់​លោក​ច្បាស់​ តាម​រយៈ​ឈ្មោះ​ដែល​មហាជន​ដាក់​ឱ្យ​គឺ អ្នក​កំប្លែង​ ឈុន ទិវ​។ កាលលោក​នៅ​សម្ដែង​កុន​ ក្នុង​​ឆ្នាំ១៩៩០​ ប្រាក់​ឈ្នួលដែល​លោក​ទទួល​បាន​​ ក្នុង​ចន្លោះ​១០​​ម៉ឺនរៀល​ ឬ​​​២០​ម៉ឺនរៀល​ ហើយ​​​ថ្លៃបំផុត​​ត្រឹម​៥០​ម៉ឺនរៀល​ ក្នុង​មួយ​រឿង ដោយ​អាស្រ័យ​លើ​​ការ​សម្ដែង​នោះ​យូរ​ថ្ងៃ​ ឬ​ឆាប់​។ ជា​ទូទៅ​ក្នុង​មួយ​រឿង​ លោក​ថត​ក្នុង​រង្វង់​​​ពី​កន្លះ​ខែ ទៅ​ដល់​មួយ​ខែ​​។​

 

មុននឹងស្លាប់ អតីតសិល្បកររូបនេះ មានជំងឺជាប់សរសៃចង្កេះ និងជាប់សរសៃពោះ, ត្បៀតសរសៃខួរក្បាល និងរលាកក្រពះ...ជាដើម។  ចំពោះដំណឹងមរណទុក្ខរបស់សិល្បករក្នុងទសវត្សរ៍៩០ (ឆ្នាំ១៩៩០)នេះ មានសិល្បករនិងមហាជនបានច្រើនបានសម្តែងការចូលរួមសោកស្តាយយ៉ាងខ្លាំងជាមួយក្រុមគ្រួសារសព ផងដែរ៕