ទស្សនកិច្ចបីប្រទេសពីថ្ងៃទី២៩ ខែសីហា ដល់ ថ្ងៃទី១ ខែកញ្ញា ជាដំណើរលើកដំបូងរបស់រដ្ឋមន្ត្រីការពារជាតិលោក Richard Marles ទៅកាន់អឺរ៉ុប។ បារាំង ជាគោលដៅសំចតមុនគេរបស់លោក Marles ។

 

ទំនាក់ទំនងរវាងអូស្រ្តាលី និងបារាំងប្រែទៅជាល្អក់កករ បន្ទាប់ពីអូស្ត្រាលីបានលុបចោលកិច្ចព្រមព្រៀងទិញនាវាមុជទឹកតម្លៃរាប់ពាន់លានដុល្លារពីបារាំងកាលពីឆ្នាំ២០២១ និងជំនួសដោយការបង្កើតសម្ព័ន្ធភាពថ្មីមួយដែលមានឈ្មោះថា AUKUS ដើម្បីកសាងនាវាមុជទឹកដើរដោយថាមពលនុយក្លេអែរជាមួយអាម៉េរិក និងអង់គ្លេស។ បារាំងខឹងសម្បារយ៉ាងខ្លាំងចំពោះការរកស៊ីកាត់មុខរបស់សម្ព័ន្ធមិត្តរបស់ខ្លួន។ 

 

ទាក់ទងនឹងការលុបចោលកិច្ចព្រមព្រៀងទិញនេះ អូស្រ្តាលីបានទូទាត់ប្រាក់សងក្រុមហ៊ុនផលិតនាវាយោធាបារាំង Naval Group ដល់ជាង៥៥៣លានដុល្លារ។ ទីក្រុងកង់បេរ៉ាសង្ឃឹមថា ដំណោះស្រាយនេះនឹងជួយជួសជុលទំនាក់ទំនងប្រេះឆារវាងអូស្ត្រាលី និងបារាំងកន្លងមក។ 

 

យោងតាមសេចក្តីថ្លែងការណ៍របស់ក្រសួងការពារជាតិអូស្រ្តាលីនៅថ្ងៃទី២៨ ខែសីហា ដំណើរទស្សនកិច្ចនៅបារាំងលើកនេះនឹងអាចជួយពង្រឹងទំនាក់ទំនងទ្វេភាគីរវាងប្រទេសទាំងពីរ។ អូស្ត្រាលី នៅតែចាត់ទុកបារាំងជាដៃគូចាស់ និងមានសមត្ថភាពបំផុត។  ​

 

ក្នុងដំណើរទស្សនកិច្ចនៅអឺរ៉ុប លោក Marles នឹងចូលរួមកិច្ចពិភាក្សាតុមូលជាមួយតំណាងឧស្សាហកម្មការពារជាតិអាល្លឺម៉ង់ មុនបន្តដំណើរទៅអង់គ្លេសដើម្បីទស្សនកិច្ចកន្លែងផលិតកប៉ាល់។ ប្រមុខការពារជាតិអូស្ត្រាលី អះអាងថា ទំនាក់ទំនងរវាងអូស្ត្រាលី និងអង់គ្លេសមានលក្ខណៈជាប្រវត្តិសាស្ត្រ និងផ្តល់ផលប្រយោជន៍គ្នាទៅវិញទៅមក ហើយត្រូវបានឆ្លុះបញ្ចាំងតាមរយៈការបន្តប្តេជ្ញាចិត្តរបស់អូស្ត្រាលីចំពោះ AUKUS៕