អន្តរជាតិ
នយោបាយអន្តរជាតិ
តាលីបង់ចោទប៉ាគីស្ថានថា បើកផ្លូវឱ្យដ្រូនអាម៉េរិកចូលដែនអាកាសអាហ្វហ្កានីស្ថាន តែប៉ាគីស្ថានបដិសេធ រដ្ឋមន្រ្តីស្តីទីការពារជាតិអាហ្វហ្កានីស្ថាន Mohammad Yaqoob Mujahid (កណ្ដាល)។ រូបថត AFP
× រដ្ឋមន្ត្រីការពារជាតិស្តីទីរបស់រដ្ឋាភិបាលតាលីបង់នៅថ្ងៃទី២៨ ខែសីហា បានចោទប៉ាគីស្ថានថា បើកផ្លូវឱ្យដ្រូនអាម៉េរិកហោះចូលដែនអាកាសអាហ្វហ្កានីស្ថាន។ យ៉ាងណាមិញ រដ្ឋមន្ត្រីការបរទេសប៉ាគីស្ថានបដិសេធការលើកឡើងនេះ។
ថ្លែងក្នុងសន្និសីទសារព័ត៌មាននៅទីក្រុងកាប៊ុល ថ្ងៃទី២៨ ខែសីហា រដ្ឋមន្ត្រីក្រសួងការពារជាតិស្តីទីអាហ្វហ្កានីស្ថាន Mullah Mohammad Yaqoob បានចោទប្រកាន់ប៉ាគីស្ថានថា អនុញ្ញាតឱ្យអាម៉េរិកប្រើប្រាស់ដែនអាកាសដើម្បីបញ្ជាដ្រូនចូលដែនអាកាសអាហ្វហ្គានីស្ថាន។
កាលពីចុងខែកក្កដា មេដឹកនាំក្រុមភេរវករអាល់កៃដា Ayman al-Zawahiri ត្រូវបានសម្លាប់នៅក្រុងកាប៊ុលដោយអាម៉េរិកក្នុងប្រតិបត្តិការដែលធ្វើឡើងតាមរយៈដ្រូន។ ពេលនោះ ប៉ាគីស្ថាន អះអាងថា មិនមានការប្រើដែនអាកាសរបស់ខ្លួនដោយអាម៉េរិកដើម្បីវាយប្រហារឡើយ។
«យោងតាមព័ត៌មានដែលយើងទទួលបាន ដ្រូនអាម៉េរិកចូលមកអាហ្វហ្កានីស្ថានតាមរយៈប៉ាគីស្ថាន។ ពួកគេប្រើប្រាស់ដែនអាកាសរបស់ប៉ាគីស្ថាន។ យើងសុំឱ្យប៉ាគីស្ថានកុំប្រើដែនអាកាសប្រឆាំងយើង»។ ប្រមុខការពារជាតិស្ដីទីរដ្ឋាភិបាលតាលីបង់ លោក Yaqoob បានលើកឡើងបែបនេះ។
យ៉ាងណាមិញ រដ្ឋមន្ត្រីការបរទេសប៉ាគីស្ថាន Bilawal Bhutto-Zardari នៅថ្ងៃទី២៨ ខែសីហា ប្រាប់ទីភ្នាក់ងារព័ត៌មាន Reuters ថា បន្ទាប់ពីការវាយប្រហារដែលសម្លាប់មេដឹកនាំអាល់កៃដា ដែនអាកាសប៉ាគីស្ថាន មិនត្រូវបានប្រើប្រាស់ទេ។ ប្រមុខការទូតរូបនេះអះអាងថា ប៉ាគីស្ថាននឹងពិនិត្យម្ដងទៀតតាមការលើកឡើងរបស់ក្រុមតាលីបង់។
លោក Bhutto-Zardari បន្ថែមថា លោកមិនចង់ប្រកែកអ្វីនៅពេលនេះដែរ ខណៈដែលប៉ាគីស្ថានកំពុងជួបវិបត្តិគ្រោះទឹកជំនន់។ បច្ចុប្បន្ន ប្រជាជនប៉ាគីស្ថានជាង ៣០លាននាក់ កំពុងរងគ្រោះដោយទឹកជំនន់។
ក្រសួងការបរទេសប៉ាគីស្ថានបានចេញសេចក្ដីថ្លែងការណ៍មួយដោយបង្ហាញការសោកស្ដាយចំពោះការចោទប្រកាន់របស់ក្រុមតាលីបង់ដោយគ្មានព័ស្តុតាងបែបនេះ។ បើតាមសេចក្ដីថ្លែងការណ៍ដដែល វាជាការចោទប្រកាន់បែបសន្និដ្ឋាន ដែលមិនមែនជាអាកប្បកិរិយាបែបការទូតប្រកបដោយការទទួលខុសត្រូវឡើយ៕
© រក្សាសិទ្ធិដោយ thmeythmey.com