ទន្ទឹមនឹងការប្រកួតពានរង្វាន់សម្តេច ស ខេង លើកទី៩ សហព័ន្ធកីឡាទូកកានូ និងរ៉ូអ៊ីងកម្ពុជាបានដាក់គោលដៅថ្មីដោយការប្រឹងប្រែងហ្វឹកហាត់ និងខិតខំស្វែងរកបទពិសោធថ្មីពីការប្រកួតកីឡាថ្នាក់ជាតិ និងNational Game ដើម្បីពង្រឹងសមត្ថភាពក្រុមកីឡាករជម្រើសជាតិឱ្យទទួលបានបច្ចេកទេសថ្មី។

 

ក្នុងដំណើរឆ្ពោះទៅកាន់ព្រឹត្តិការណ៍ស៊ីហ្គេម២០២៣ ខាងមុខដែលជាប្រវត្តិសាស្រ្តដំបូងនៅកម្ពុជា សហព័ន្ធបានយកចិត្តទុកដាក់ជាខ្លាំងចំពោះក្រុមកីឡាករ។ លោក គង់ សុភាព មន្រ្តីបច្ចេកទេសកីឡាទូកកានូ និងរ៉ូអ៊ីងកម្ពុជាបានប្រាប់សារព័ត៌មានថ្មីៗ តាមរយៈតេលេក្រាមថា៖«ការរៀបចំការប្រកួតនេះគឺយើងផ្តោតសំខាន់ឆ្ពោះទៅស៊ីហ្គេម។ ខែ១១ យើងប្រកួត National Game ហ្នឹងហើយជាការឆ្ពោះទៅស៊ីហ្គេម២០២៣ សម្រាប់វាស់ស្ទង់សមត្ថភាពរបស់កីឡាករដែលបានហ្វឹកហាត់»។ លោក គង់ សុភាព បញ្ជាក់យ៉ាងដូច្នេះ។

 

គួររំឭកផងដែរថា កីឡាទូកកានូ និងរ៉ូអ៊ីងកម្ពុជា បានបញ្ចប់បេសកកម្មពីព្រឹត្តិការណ៍កីឡាស៊ីហ្គេមលើកទី៣១ នាប្រទេសវៀតណាម កាលពីខែឧសភា កន្លងទៅ ដោយនាំយកមេដាយសំរឹទ្ធ១ សម្រាប់ប្រទេសកម្ពុជា៕