កីឡដ្ឋានខេត្តកំពង់ស្ពឺ ត្រូវបានដាក់ឲ្យប្រើប្រាស់ជាផ្លូវការ ចាប់ពីថ្ងៃទី៦ ខែកញ្ញា តទៅ ក្រោយដំណើរការសាងសង់អស់រយៈពេលជាង១ឆ្នាំកន្លះ។ ពិធីសម្ពោធ បានប្រព្រឹត្តទៅក្រោមអធិបតីភាពលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងដែនដី នគរូបនីយកម្ម និងសំណង់។
ចម្ងាយប្រមាណ៤គីឡូម៉ែត្រពីផ្លូវជាតិលេខ៤ ក្នុងភូមិតាម៉ុល សង្កាត់ច្បារមន ក្រុងច្បារមន «កីឡដ្ឋានខេត្តកំពង់ស្ពឺ» បានក្លាយជាកីឡដ្ឋានស្តង់ដារដំបូងបំផុតនៅក្នុងខេត្តមួយនេះ ជាពិសេសកីឡាបាល់ទាត់ ដែលពេញនិយមបំផុត។
កីឡដ្ឋាន ត្រូវបានសាងសង់ឡើងក្រោមគំនិតផ្តួចផ្តើមរបស់លោក ហ៊ុន ម៉ាន ដែលជាអ្នកតំណាងរាស្ត្រមណ្ឌលកំពង់ស្ពឺ ដោយលោកសម្រេចឲ្យមានគម្រោងនេះ ដើម្បីរួមចំណែកអភិវឌ្ឍនវិស័យកីឡាក្នុងខេត្ត និងក្នុងក្របខណ្ឌកម្ពុជាទាំងមូល ដែលកំពុងត្រៀមធ្វើជាម្ចាស់ផ្ទះសម្រាប់ព្រឹត្តិការណ៍កីឡាស៊ីហ្គេមឆ្នាំ២០២៣។
ក្រោមការគាំទ្រពីភាគីពាក់ព័ន្ធជាពិសេសរដ្ឋបាលខេត្ត ទីតាំងសាងសង់ត្រូវបានកំណត់កាលពីឆ្នាំ២០១៨ ហើយក្រោមការអំពាវនាវពីសំណាក់លោក ហ៊ុន ម៉ានី ក្រុមការងារសាងសង់ ទទួលបានថវិកាឧបត្ថម្ភធំដំបូងចំនួន២លានដុល្លារអាម៉េរិក ពីគម្រោងណាហ្គាវើលដ៍បេះដូងសប្បុរស។
តាមរបាយការណ៍ កីឡដ្ឋានបានចាប់ផ្តើមបើកការដ្ឋាននៅថ្ងៃទី២១ ខែកុម្ភៈ ឆ្នាំ២០២១ ហើយបញ្ចប់ការសាងសង់នៅថ្ងៃទី២១ ខែសីហា ឆ្នាំ២០២២ ដោយក្រុមហ៊ុន Camfield Trading ជាមួយនឹងការសិក្សាបច្ចេកទេសប្លង់ស្ថាបត្យកម្មពីក្រុមក្រុមហ៊ុន Mekong Co.Ltd។
កីឡដ្ឋានមានកន្លែងសម្រាប់អ្នកទស្សនាចំនួន៣០០០នាក់ ដោយក្រៅពីទីលានបាល់ទាត់ កីឡដ្ឋានខេត្តកំពង់ស្ពឺ ក៏មានទីលានរត់ប្រណាំង សួនកុមារ កន្លែងហាត់ប្រាណ សំណង់រូបសំណាកព្រះបាទជ័យវរ្ម័នទី៧ និងរូបសំណាកសម្តេចព្រះសង្ឃរាជ ជួន ណាត ផងដែរ។
តាមរបាយការណ៍ ការងារសាងសង់ហេដ្ឋារចនាសម្ព័ន្ធទាំងអស់នៃកីឡដ្ឋានខេត្តកំពង់ស្ពឺ ចំណាយថវិការសរុបអស់ប្រមាណ៣,៥លានដុល្លារអាម៉េរិក ដោយប្រើប្រាស់ថវិកាដែលកៀរគរបានពីក្រុមហ៊ុនឯកជន និងសប្បុរសជននានាន តាមរយៈលោក ហ៊ុន ម៉ានី ចំនួន ជាង២,៩លានដុល្លារ ហើយថវិកាដែលនៅខ្វះត្រូវបំពេញបន្ថែម មាន៥៨ម៉ឺនដុល្លារ។
បើទោះបីជាត្រូវបានសម្ពោធដាក់ឲ្យប្រើប្រាស់ជាផ្លូវការក៏ដោយ ប៉ុន្តែគម្រោងសាងសង់នៅតែមានជំហានបន្តទៅមុខទៀត ដូចជាការបំពាក់សម្ភារ បរិក្ខាការិយាល័យ តុ កៅអី តាមបន្ទប់ បន្ទប់ផ្លាស់ប្តូរសម្លៀកបំពាក់សម្រាប់កីឡាករ ការបំពាក់ប្រព័ន្ធសំឡេង ប្រព័ន្ធកាមេរ៉ាសុវត្ថិភាព ការសាងសង់កន្លែងបង្ហាញលទ្ធផល (Score Board) និងផ្លូវរត់ប្រណាំងជុំវិញទីលានបាល់ទាត់។
សូមបញ្ជាក់ថា កីឡដ្ឋានកំពង់ស្ពឺ ដែលសង់លើផ្ទៃដីរួមទំហំជាង៤៣ម៉ែត្រក្រឡានេះ ក៏នឹងក្លាយជាផ្ទះរបស់ក្លិបណាហ្គាវើល៍ ផងដែរ។ ណាហ្គាវើលដ៍ ដែលមានឈ្មោះដើមថា ណាហ្គាខប ត្រូវបានបង្កើតឡើងតាំងពីឆ្នាំ២០០១ ដោយមានមូលដ្ឋាននៅរាជធានីភ្នំពេញ។
ក្លិបនេះ ឈ្នះពានក្របខណ្ឌកំពូល ៣លើក និងពានសម្តេច ហ៊ុន សែន ១លើក តែជាក្រុមដែលទទួលបានចំណាត់ថ្នាក់លេខ២ ច្រើនជាងគេក្នុងក្របខណ្ឌកំពូល និងពានសម្តេច ហ៊ុន សែន។ ការប្រើប្រាស់កីឡដ្ឋាននៅខេត្តកំពង់ស្ពឺ ជាមូលដ្ឋានក្នុងដី មានន័យថា នេះជាលើកដំបូង ក្រោយបង្កើតបាន២១ឆ្នាំ ដែលក្លិបមួយនេះ មានកីឡដ្ឋានផ្ទាល់ខ្លួន៕