អន្តរជាតិ
នយោបាយអន្តរជាតិ
អ្នកការទូតរុស្ស៊ី៖ លោក ពូទីន នឹងជួបលោក ស៊ី ដោយផ្ទាល់នៅអ៊ូសបេគីស្ថាននៅសប្ដាហ៍ក្រោយ ប្រធានាធិបតីរុស្ស៊ី វ៉្លាឌីមៀ ពូទីន ជួបលោកប្រធានាធិបតីចិន ស៊ី ជិនភីង កាលពីខែកុម្ភៈ។ រូបថត Xinhua
× អគ្គរដ្ឋទូតរុស្ស៊ីប្រចាំទីក្រុងប៉េកាំងលោក Andrey Denisov បានប្រាប់ទីភ្នាក់ងាររុស្ស៊ីនៅថ្ងៃទី៧ ខែកញ្ញាថា ប្រធានាធិបតីចិន ស៊ី ជិនភីង និងប្រធានាធិបតីរុស្ស៊ី វ្ល៉ាឌីមៀ ពូទីន នឹងជួបពិភាក្សាគ្នាផ្ទាល់អំឡុងចូលរួមកិច្ចប្រជុំអង្គការសហប្រតិបត្តិការសៀងហៃ (SCO) នៅអ៊ូសបេគីស្ថានក្នុងសប្ដាហ៍ក្រោយ។ ភាគីទាំងពីររំពឹងនឹងពិភាក្សាលើបញ្ហាទ្វេភាគី និងបញ្ហាអន្តរជាតិជាច្រើន។
បើតាមអគ្គរដ្ឋទូតរុស្ស៊ីប្រចាំក្រុងប៉េកាំងលោក Andrey Denisov ដែលបានប្រាប់ទីភ្នាក់ងាររុស្ស៊ី មេដឹកនាំក្រុងមូស្គូ និងក្រុងប៉េកាំងនឹងជួបគ្នានៅប៉ុន្មានថ្ងៃខាងមុខនៅកិច្ចប្រជុំកំពូលមេដឹកនាំអង្គការ SCO ដែលធ្វើនៅទីក្រុង Samarkand របស់អ៊ូសបេគីស្ថាន។
«យើងកំពុងរៀបចំផែនការកិច្ចប្រជុំដ៏សំខាន់និងពេញលេញមួយរវាងមេដឹកនាំទាំងពីររបស់យើង ហើយពួកយើងកំពុងធ្វើការលើរបៀបវារៈលម្អិតជាមួយដៃគូចិនរបស់យើង»។ លោក Denisov លើកឡើងបែបនេះរួចបន្ថែមថា មេដឹកនាំទាំងពីរមានបញ្ហាជាច្រើនដែលត្រូវពិភាក្សាទាំងបញ្ហាទ្វេភាគី និងបញ្ហាអន្តរជាតិ។
អង្គការសហប្រតិបត្តិការសៀងហៃ ជាប្លុកមួយដែលមានសមាជិកដូចជា ចិន រុស្ស៊ី និងប្រទេសតំបន់អាស៊ីកណ្ដាលបួនទៀតរួមមានកាហ្សាក់ស្ថាន, កៀហ្ស៊ីស៊ីស្ថាន, អ៊ូសបេគីស្ថាន និង តាហ្ស៊ីគីស្ថាន។ កិច្ចប្រជុំកំពូលរបស់ SCO នឹងធ្វើឡើងនៅថ្ងៃទី១៥ និងទី១៦ ខែកញ្ញានៅទីក្រុង Samarkand។
គួរបញ្ជាក់ថាទំនាក់ទំនងចិននិងរុស្ស៊ីនៅតែបន្តភាពជិតស្និទ្ធក្នុងរយៈពេលចុងក្រោយនេះ ទោះបីជាមានសម្ពាធពីលោកខាងលិចក៏ដោយ។ ខណៈរងទណ្ឌកម្មរបស់លោកខាងលិចដែលមិន ធ្លាប់មានចាប់តាំងពីការវាយលុកយោធានៅអ៊ុយក្រែន រុស្ស៊ីបានព្យាយាមពង្រឹងទំនាក់ទំនងជាមួយបណ្តាប្រទេសអាស៊ី ជាពិសេសចិន។ កន្លងមក ទីក្រុងប៉េកាំងមិនបានថ្កោលទោសអន្តរាគមន៍របស់ទីក្រុងមូស្គូនៅអ៊ុយក្រែនទេ តែបែរជាបានរិះគន់អាម៉េរិកដែលបន្តលក់អាវុធឱ្យក្រុងកៀវ។
កាលពីជំនួបខែកុម្ភៈប៉ុន្មានថ្ងៃមុនការលុកលុយអ៊ុយក្រែនបានចាប់ផ្ដើម លោក ស៊ី និងលោក ពូទីន បានពិភាក្សាគ្នាលើបញ្ហាទំនាក់ទំនងទ្វេភាគីនិងបញ្ហាពិភពលោករួមទាំងជំងឺកូវីដ-១៩ និងបញ្ហាសន្តិសុខ។ ភាគីទាំងពីរក៏ប្រកាសថា ទំនាក់ទំនងទៅវិញទៅមក មិនមានដែនកំណត់ឡើយ។
© រក្សាសិទ្ធិដោយ thmeythmey.com