មុនដំណើរឆ្ពោះទៅព្រឹត្តិការណ៍កីឡាស៊ីហ្គេមលើកទី៣២ ដែលជាប្រវត្តិសាស្រ្តដំបូងសម្រាប់កម្ពុជាក្នុងការរៀបចំធ្វើជាម្ចាស់ផ្ទះ នាឆ្នាំ២០២៣ ខាងមុខ សហព័ន្ធកីឡាសីដក់ និងឈិនឡូនកម្ពុជាបានយកចិត្តទុកដាក់ក្នុងការពង្រឹងសមត្ថភាពបន្ថែមទៅដល់កីឡាករ-កីឡាការិនី គ្រូបង្វឹក ដើម្បីសម្រេចគោលដៅ។

លោក លី ទីឈ័ង អគ្គលេខាធិការសហព័ន្ធកីឡាសីដក់ និងឈិនឡូនកម្ពុជា ប្រាប់សារព័ត៌មានថ្មីៗថា សហព័ន្ធបានកំណត់គោលដៅក្នុងការប្រជែងមេដាយស៊ីហ្គេម២០២៣ យ៉ាងហោចណាស់មេដាយមាស៣៖«សម្រាប់មេដាយមាសកីឡាសីដក់របស់យើងគឺរំពឹងបាន៣គ្រឿង នៅក្នុងព្រឹត្តិការណ៍ស៊ីហ្គេមហ្នឹង»។ លោក អគ្គលេខាធិការនិយាយដូច្នេះ។

 

ជាមួយនឹងការរំពឹងមេដាយមាសនេះដែរសហព័ន្ធក៏ត្រៀមបញ្ជូនអត្តពលិកចេញទៅហ្វឹកហាត់នៅប្រទេសថៃ និងមីយ៉ាន់ម៉ាផងដែរ ប៉ុន្តែនៅមានភាពស្រពិចស្រពិលមួយចំនួននៅខាងភាគីថៃ ដោយមានការលើកពេលពីចន្លោះខែ៩-១០ ឆ្នាំ២០២២ ទៅខែ៣-៤ ឆ្នាំ២០២៣ វិញ។ 

 

គួររំឭកដែរថា កីឡាសីដក់ជម្រើសជាតិកម្ពុជាដណ្តើមបានមេដាយ៤ ក្នុងនោះមេដាយប្រាក់២ និងសំរឹទ្ធ២ ពីព្រឹត្តិការណ៍ជើងឯកពិភពលោក នៃពានរង្វាន់ព្រះមហាក្សត្រថៃ លើកទី៣៥(The 35 King Cup World Champion 2022) កាលពីថ្ងៃទី៣១ កក្កដា នាទីក្រុងបាងកក ប្រទេសថៃ៕