ក្នុងដំណើរឆ្ពោះទៅកាន់ព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣ ប្រធានក្រុមកីឡាសីដក់ និងឈិនឡូនកម្ពុជាកីឡាករ ហេង រ៉ាវុធ សង្ឃឹម និងជឿជាក់យ៉ាងម៉ឺងម៉ាត់ចំពោះគោលដៅធំក្នុងការប្រជែងយកមេដាយសម្រាប់កម្ពុជា។

ក្នុងបទសម្ភាសផ្ទាល់ជាមួយសារព័ត៌មានថ្មីៗ ប្រធានក្រុមរូបនេះបានបញ្ជាក់ថា សម្រាប់ការហ្វឹកហាត់ក្រុមកីឡាសីដក់មានការប្តេជ្ញាខ្ពស់ក្នុងការដណ្តើមយកមេដាយ៖«ឆ្នាំនេះគឺប្រឹងប្រែងខ្លាំងមែនទែន ដោយសារស៊ីហ្គេមនៅស្រុកខ្មែរយើងមានគោលដៅធំគឺដើម្បីយកមេដាយជូនជាតិ អ៊ីចឹងដើម្បីបានសមិទ្ធផលហ្នឹងគឺមានតែការហ្វឹកហាត់ប្រឹងប្រែងខ្លាំង និងទទួលបទពិសោធពីគ្រូបង្វឹកដែលគាត់មានបច្ចេកទេសថ្មីៗ។ វាមានតែគោលដៅមួយទេមិនអាចមានមធ្យោបាយណាមួយកាត់ដើម្បីទទួលបានមេដាយនោះទេ មានតែការហ្វឹកហាត់ដោយបច្ចេកទេស និងត្រឹមត្រូវ»។ កីឡាករ ហេង រ៉ាវុធ និយាយដូច្នេះ។

 

ទោះបីការហ្វឹកហាត់នេះមានផលវិបាកច្រើនតែប្រធាមក្រុមកីឡាសីដក់ និងឈិនឡូនប្រកាន់ជំហរយ៉ាងមុតមាំ និងមានឆន្ទៈមិនរាថយចំពោះឧបសគ្គនេះឡើយ ដោយរូបគេប្តេជ្ញាថានឹងនាំមេដាយជូនជាតិឱ្យបាននាស៊ីហ្គេមលើកទី៣២៖«ខ្ញុំរំពឹងថានឹងទទួលបានមេដាយជូនជាតិមាតុភូមិដែរ»។

 

ជាមួយនឹងការរំពឹងនេះដែរប្រធានក្រុមដដែលមើលឃើញថាកីឡាករជំនាន់ក្រោយមានការប្តេជ្ញាខ្ពស់ក្នុងការហ្វឹកហាត់ និងមានកាយសប្បទាល្អៗច្រើន ហើយក៏ទទួលបានបទពិសោធពីចាស់ៗដែលមានបច្ចេកទេសកម្រិតខ្ពស់ ម្យ៉ាវិញទៀតសម័យអ៊ីនធឺណែត មានយូធូប(Youttube)សម្រាប់មើលតាក់ទិចក្នុងការលេងផងដែរ៕