«ទិវាអាស៊ានហាត់ប្រាណដើម្បីសុខភាព(Fit ASEAN)» នឹងធ្វើឡើងនៅកីឡដ្ឋានខេត្តកំពត នៅថ្ងៃទី១ ខែតុលា ឆ្នាំ២០២២។ កម្មវិធីនេះ បានដាក់បញ្ចូលវិញ្ញាសា ៣ប្រភេទរួមមាន៖ ជិះកង់ចម្ងាយ ១៥គីឡូម៉ែត្រ, រត់ចម្ងាយ ៥គីឡូម៉ែត្រ និងហាត់ប្រាណរាំតាមចង្វាក់ភ្លេង។ ហាត់ប្រាណរាំតាមចង្វាក់ភ្លេង ត្រូវបានប្រជាពលដ្ឋកម្ពុជាភាគច្រើនអនុវត្តន៍ជាច្រើនឆ្នាំមកហើយ ដែលគេមានឃើញនៅទីសារធារណផ្សេងៗ។

 

សម្រាប់ការចេញសេចក្តីជូនដំណឹងរបស់ក្រសួងអប់រំ យុវជន និងកីឡា គឺមានគោលបំណងឱ្យមានភាពសប្បាយរីករាយរបស់ប្រជាជន និងរួមចំណែកអភិវឌ្ឍសេដ្ឋកិច្ចគ្រួសារ សហគមន៍ សង្គមគ្រួសារ និងសហគមន៍អាស៊ានប្រកបដោយសុខដុមរមនា។

 

ចំពោះចំនួនមនុស្សដែលចូលរួមក្នុងកម្មវិធី«ទិវាអាស៊ានហាត់ប្រាណដើម្បីសុខភាព(Fit ASEAN)» លោក ណុប ណាប់ ប្រធានការិយាល័យអប់រំកាយ និងកីឡាខេត្តកំពត ប្រាប់សារព័ត៌មានថ្មីៗនាថ្ងៃទី២២ កញ្ញា នេះថាចំនួនមនុស្សចូលរួមមានជាង១ពាន់នាក់។ លោក ណុប ណាប់ បន្ថែមថាសម្រាប់ភ្ញៀវបរទេសពុំមានវត្តមានឡើយ តែប្រសិនបើមានការចូលរួមក៏មិនមានបញ្ហាអ្វីនោះទេ គឺអាចចូលរួមបានជាមួយគ្នា៖

 

គួរបញ្ជាក់ថា កម្មវិធី«ទិវាអាស៊ានហាត់ប្រាណដើម្បីសុខភាព(Fit ASEAN)» នេះជាលើកដំបូងដែលបានប្រារព្ធឡើងនៅកម្ពុជា និងធ្វើឡើងនៅកីឡដ្ឋានខេត្តកំពត មានរយៈមួយព្រឹកគឺចាប់ពីម៉ោង ៦:០០នាទីព្រឹក ថ្ងៃទី១ ខែតុលា ឆ្នាំ២០២២៕