បន្ទាប់ពីកិច្ចព្រមព្រៀងពាណិជ្ជកម្មសេរីភាគីកម្ពុជា-កូរ៉េ  ចូលជាធរមានហើយនោះ វានឹងជំរុញកំណើននៃការនាំចេញ កំណើនផលទុនសរុបក្នុងស្រុក និងកំណើនឱកាសការងារ ព្រមទាំងជួយស្តារសេដ្ឋកិច្ចឡើងវិញ របស់ប្រទេសទាំងពីរ ដែលទទួលរងផលប៉ះពាល់ជំងឺកូវីដ-១៩ តាមរយៈការពង្រីកការធ្វើសេរីភាវូបនីយកម្មទីផ្សារ។ 

 

កូរ៉េខាងត្បូង គឺជាទីផ្សារបំពេញបន្ថែមមួយសម្រាប់កម្ពុជា ក្នុងចំណោមប្រទេសនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់(RECP)។ លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានបញ្ជាក់ប្រាប់សារព័ត៌មានយ៉ាងដូច្នេះ៖ «ពេលដែលយើងទទួលបាននូវកិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសអភិវឌ្ឍបានច្រើន វាគឺជាសញ្ញាវិជ្ជមានមួយសម្រាប់សេដ្ឋកិច្ច និងសម្រាប់ទំនិញរបស់យើង»។  លោក សុវិជាតិ បានបញ្ជាក់ថា ទីផ្សារប្រទេសជប៉ុន និងកូរ៉េ គឺត្រូវបានគេទទួលស្គាល់នូវទំនិញដែលមានលក្ខណៈឆ្លើយតបគ្រប់គ្រាន់នឹងសេចក្តីត្រូវការរបស់ទីផ្សារប្រទេសផ្សេងៗ។