លោក គង់ សុភាព មានក្តីរំពឹងថាវិញ្ញាសាទូកកាចាចំណុះ៥នាក់ និងនារី៣នាក់អាចមានលទ្ធភាពគ្រប់គ្រាន់ក្នុងការប្រជែងមេដាយមាស ព្រោះពួកគេមានការប្រឹងប្រែងហ្វឹកហាត់ខ្លាំងក្រោយចប់ស៊ីហ្គេមនៅវៀតណាម។ ប្រឹងហ្វឹកហាត់ ធ្វើឱ្យពួកគេកើនសមត្ថភាព ដោយស្របតាមយុទ្ធសាស្រ្តផែនការមេ ដើម្បីធ្វើយ៉ាងណាឱ្យទទួលបានមេដាយតាមការគ្រោងទុក។

 

លោក សុភាព បន្តថា៖«សម្រាប់ក្រុមជម្រើសជាតិយើងគឺប្រមូលផ្តុំហ្វឹកហាត់រហូតទាល់តែដល់ស៊ីហ្គេម២០២៣។ សម្រាប់យើងគឺមិនមានពេលសម្រាកទេ ក្រោយចប់ស៊ីហ្គេមនៅវៀតណាម»។

គួរបញ្ជាក់ថា សហព័ន្ធកីឡាទូកកានូ និងរ៉ូអ៊ីងកម្ពុជា បានដាក់ចេញនូវវិញ្ញាសា១៣ ប្រភេទទៅក្នុងការប្រកួតកីឡាស៊ីហ្គេមលើកទី៣២ ឆ្នាំ២០២៣។ ក្នុងនោះសហព័ន្ធផ្តោតទៅលើវិញ្ញាសាទូកកាចាចំណុះ៥នាក់ និងនារី៣នាក់ ដោយសង្ឃឹមឈ្នះមេដាយមាសតែម្តង៕