ចំពោះករណីគប់ដបទឹកសុទ្ធពីសំណាក់អ្នកគាំទ្រទៅលើមន្រ្តីរៀបចំការប្រកួតនេះ គណៈកម្មការវិន័យរបស់ FFC បានសម្រេចពិន័យក្លិបបាល់ទាត់ភ្នំពេញក្រោនដោយយោងតាមប្រការ៦៧ ស្តីពី «ទំនួលខុសត្រូវចំពោះការប្រព្រឹត្តរបស់ទស្សនិកជន»។
 

លោក លី ហៀង អគ្គលេខាធិការក្លិបបាល់ទាត់ភ្នំពេញក្រោន បានបញ្ជាក់ថាមិនមែនជាការពិនន័យធ្ងន់ធ្ងរអ្វីនោះទេចំពោះក្លិប នេះគ្រាន់តែជាករណីពិន័យជាទឹកប្រាក់ប៉ុណ្ណោះ។ លោកលី ហៀង ប្រាប់សារព័ត៌មានថ្មីៗនៅថ្ងៃទី៤ ខែវិច្ឆិកា ក្រោយពីសរសេរសេចក្តីប្រកាសជុំវិញការពិន័យនេះលើផេកហ្វេសប៊ុកផ្លូវការរបស់ក្លិប។

 

លោក លី ហៀង បន្ថែមថា៖«គ្រាន់តែពិន័យជាប្រាក់ទេ មិនមានអ្វីធ្ងន់ធ្ងរទេ យើងនឹងផ្សព្វផ្សាយបន្ថែមដើម្បីផ្តល់ការអប់រំសម្រាប់ប្រិយមិត្តបាល់ទាត់»។ លោក លី ហៀង និយាយដូច្នេះ។ បើទោះពិន័យតិចតួចក្តី ប៉ុន្តែ អគ្គលេខាធិការរូបនេះសោយស្តាយចំពោះទង្វើរបស់អ្នកគាំទ្រខ្លួន។

 

យ៉ាងណាបើតាមរយៈសំណេរនៅលើផេកហ្វេសប៊ុកផ្លូវការរបស់ក្លិបបាល់ទាត់ភ្នំពេញក្រោនបានសរសេរថា ក្លិបមិនមានការគាំទ្រណាមួយទៅលើការប្រើប្រាសសកម្មភាពដែលត្រូវបានចាត់ចូលជាអំពើហិង្សាឡើយ។ ក្លិបសំណូមពរឱ្យអ្នកគាំទ្រជៀសវៀងការប្រើអំពើហិង្សា ហើយចូលរួមទាំងអស់គ្នាដើម្បីភាពវិជ្ជមាននៃវិស័យបាល់ទាត់ជាតិ ក៏ដូចជាបញ្ឈប់អំពើហិង្សាទាំងឡាយ ទាំងនៅលើទីលាន សហគមន៍ និងសង្គមជាតិផងដែរ។

 

គួរបញ្ជាក់ថា ករណីមានអ្នកគាំទ្រគប់ដបទឹកសុទ្ធទៅលើមន្រ្តីរៀបចំការប្រកួតកើយឡើងក្នុងការប្រកួតពានរង្វាន់បាល់ទាត់ក្របខណ្ឌខេមបូឌានព្រីមៀរលីគ រវាងម្ចាស់ផ្ទះភ្នំពេញក្រោន និងភ្ញៀវវិសាខា កាលពីថ្ងៃទី២៩ ខែតុលា ឆ្នាំ២០២២ នៅកីឡដ្ឋាន ស្មាត អ.អេស.អិន៕