លោក មាស ចាន់ណា បានប្រាប់សារព័ត៌មានថ្មីៗតាមទូរស័ព្ទ ទាំងអារម្មណ៍សប្បាយចិត្តចំពោះការគ្រងជើងឯកពានសម្ដេច ហ៊ុន សែន រដូវកាល២០២២ ថានៅតង់ទី១ បឹងកេត លេងបានយ៉ាងល្អ ព្រោះមានយុទ្ធសាស្ដ្រវាយបក ដែលមានគុណភាព។ បន្ថែមទៀតនោះ ខ្សែប្រយុទ្ធ ២ សំខាន់ៗ គឺ ម៉ាត់ ណូរុន និង សៀង ចន្ធា ជាកីឡាករល្អ ដែលធ្វើឲ្យខ្សែការរបស់វិសាខា មានការពិបាកក្នុង បិទអ្នកទាំង២នេះ។ 
 

នៅតង់ទី១ បឹងកេត នាំមុខ វិសាខា លទ្ធផល ២-០ ដោយកីឡាករ សៀង ចន្ធា ជាអ្នកស៊ុតបញ្ចូលទី។ ដោយឡែក វិសាខា ក៏វាយបកខ្លះ ប៉ុន្ដែការបញ្ចប់ទី ប៉ះជាមួយបង្គោលទីជាច្រើនលើក។ លុះចូលដល់តង់ទី២ វិសាខា បានផ្លាស់ប្ដូរយុទ្ធសាស្ដ្រប្រកួត ដោយដឹងថា បឹងកេត នឹងបន្ថែមការការពារ ព្រោះមានប្រៀបជាងវិសាខា ក្នុងគ្រាប់បាល់នាំមុខ ២-០។ 
 

«យើង បានប្ដូយុទ្ធសាស្ដ្រប្រកួតនៅតង់ទី២។ ហើយ១គ្រាប់ដំបូងរបស់វិសាខា រកបានដោយ ស៊ិន សុផាណាត់ ធ្វើឲ្យក្រុមមានកម្លាំងចិត្តកាន់តែខ្លាំង។»។ លោក មាស ចាន់ណា និយាយបែបនេះ។
  

កីឡាករ ស៊ិន សុផាណាត់ វាយបកគ្រាប់ទី១ នៅនាទី៧៩ នាំឲ្យលទ្ធផល ២-១។ លុះចូលដល់នាទី ៩០+៦ នាទីចុងក្រោយ អ្នកចាំទី កែវ សុខសិលា លោតប្រើខ្នងរបស់ខ្លួន តែតបញ្ចូលទី បន្ទាប់ពីមិត្តរួមក្រុមទាត់បាល់ជ្រុង។ 
 

នៅម៉ោងប្រកួតបន្ថែម ១៥នាទី លើកទី១ នាទី៩០+៨ វិសាខា នាំមុខ ៣-២ ដោយ ប៊ិន ចន្ថាធារី ខ្សែការពាររបស់វិសាខា ហើយតាមស្មើ ដោយ ​ឱ ភារុណ របស់បឹងកេត នៅនាទី៩០+១២។  ២នាទីបន្ទាប់ កីឡករ កែវ សុខផេង របស់វិសាខា បន្ថែមបាន ១គ្រាប់ទៀត នាំឲ្យលទ្ធផល ៤-៣។ 
 

បឹងកេត បានព្យាយាមច្រើនលើក ប៉ុន្ដែត្រូវបានខ្សែការពាររបស់វិសាខា សង្គ្រោះបាន។ បាល់ជ្រុងជាច្រើនលើកនៅ ៣នាទីចុងក្រោយ របស់បឹងកេត ធ្វើឲ្យវិសាខា មានសម្ពាធជាខ្លាំង ដោយស៊ុតចំបង្គោលទីជាច្រើនលើក។
 

«យើង បានផ្លាស់ប្ដូយុទ្ធសាស្ដ្រប្រកួត។ នៅតង់ទី១ យើងមិនមានសំណាង ដូចតង់ទី២ទេ ព្រោះកីឡាករ ស៊ុតចំបង្គោលទី ក្លិបបឹងកេត ២ ទៅ ៣លើក ប៉ុន្ដែ ចុងតង់ទី២ បឹងកេត បែរទៅជាមិនមានសំណាងវិញ ព្រោះស៊ុតចំបង្គោលទីដូចគ្នា។ បាល់ទាត់ ត្រូវការយុទ្ធសាស្ដ្រល្អ ប៉ុន្ដែក៏ត្រូវបូករួមជាមួយសំណាងខ្លះដែរ។»។ គ្រូបង្វឹកក្លិបវិសាខា រូបនេះ បានបញ្ជាក់ដូច្នេះ។
  

ចំណែក លោក ហៅ សុជាតិ គ្រូបង្វឹកស្ដីទីក្លិបបឹងកេត បានបញ្ជាក់ថា កីឡាករ របស់បឹងកេត ខូចទម្រង់លេង ក្រោយពីផ្លាស់ប្ដូរកីឡាករ មួយចំនួនចេញ។ គ្រូបង្វឹករូបនេះ និយាយថា៖​«ចំពោះការប្រកួតម្សិលមិញយើងធ្វើបានល្អ តែពិតជាគួរឲ្យស្ដោយស្ដាយមែនទែន ដែលយើងបាត់បង់ឱកាសល្អមួយនេះ។ យើង ធ្វើបានល្អនៅតង់ទី១ ដោយនាំមុខគេដល់ទៅ ២-០ ហើយនៅផ្ដើមតង់ទី២ យើងនៅតែបន្ដល្អ តែបន្ទាប់ពី យើងផ្លាស់ប្ដូរកីឡាករមួយចំនួន យើងឃើញថាចាប់ផ្ដើមមានបញ្ហា ទាំងទម្រង់ក្រុម និងការប្រមូលអារម្មណ៍កីឡាករ មានការធ្លាក់ចុះ។»។
 

ក្នុងថ្ងៃជាមួយគ្នានេះដែរ មុនពេលជំនួប វិសាខា និងបឹងកេត ក្នុងការប្រជែងយកជើងឯក ក្លិបអគ្គិសនីកម្ពុជា បានចាញ់ម្ចាស់ផ្ទះ ភ្នំពេញក្រោន ក្នុងលទ្ធផល ៥-០ ក្នុងការប្រកួតយកជ័យលាភីលេខ៣។
 

គួរបញ្ជាក់ផងដែរ វិសាខា បានឈ្នះតំណែងជើង ៣ឆ្នាំជាប់គ្នា គឺ ២០២០, ២០២១ និង ឆ្នាំ២០២២នេះ រីឯ បឹងកេត ធ្លាប់ជាជើងឯក ១សម័យកាល នៅឆ្នាំ២០១៩៕