សម្តេចនាយករដ្ឋមន្រ្តី ហ៊ុន សែន ៖«ទិវាបុណ្យឯករាជ្យជាតិ៩វិច្ឆិកា បានរម្លឹកឲ្យឃើញពីព្រះរាជបេសកកម្មរបស់ព្រះករុណា ព្រះបាទ សម្តេចព្រះនរោត្តម សីហនុ ព្រះបិតាឯករាជ្យជាតិ ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និងព្រះបញ្ញាញាណយ៉ាងក្លៀវក្លាបំផុត តស៊ូក្នុងក្របខ័ណ្ឌនៃព្រះរាជបូជនីយកិច្ច ដើម្បីទាមទារឯករាជ្យដ៏ពិតប្រាកដនៅកម្ពុជា»។ 

 

លោក កឹម សុខា ៖«ដើម្បីឲ្យមានឯករាជ្យជាតិពិត គឺត្រូវគោរពសិទ្ធិគ្នា។ បើខ្មែរចេះគោរពសិទ្ធិគ្នា មិនបង្កឲ្យមានការឈឺចាប់ មិនយកខ្មែរណាជាសត្រូវ នោះនឹងនាំមកនូវសាមគ្គីភាពជាតិ។

សាមគ្គីភាពជាតិ នាំឲ្យមានឯកភាពជាតិ និងនាំមកនូវឯករាជ្យជាតិរឹងមាំ»។ 

 

ដោយឡែក លោក សម រង្ស៊ី ពុំបានបញ្ចេញមតិផ្ទាល់ខ្លួនឡើយជុំវិញទិវាឯករាជ្យជាតិនេះឡើយ តែលោក បានដកស្រង់ខ្លឹមសារខ្លះៗចេញពីសៀវភៅ ដែលមានចំណងជើងថា «ប្រវត្តិសាស្រ្តនៃប្រទេសកម្ពុជា» របស់លោក វ៉ាន់ឌី កាអុន ទៅបង្ហោះ។ 

 

«សម្តេច ព្រះនរោត្តម សីហនុ បានដើរតួនាទីនាំមុខដ៏សំខាន់បំផុត ក្នុងការបើកយុគសម័យថ្មីមួយដ៏រុងរឿង សម្រាប់ប្រទេសកម្ពុជា។ ឥស្សរជនខ្មែរស្នេហាជាតិ ដែលបានធ្វើការយ៉ាងស្វិតស្វាញជាមួយសម្តេចព្រះនរោត្តម សីហនុ នៅពេលនោះ មានជាអាទិ៍ សម្តេច ប៉ែន នុត សម្តេច ញឹក ជូឡុង លោក សម សារី និងលោក ទេព ផន»។ នេះជាសំណេរបស់លោក សម រង្ស៊ី ដែលលោកសរសេរ ដោយយោងទៅតាមសៀវភៅរបស់លោក វ៉ាន់ឌី កាអុន។ 

 

សូមរម្លឹកថា បារាំង បានដាក់អាណានិគមលើប្រទេសកម្ពុជាអស់រយៈពេល៩០ឆ្នាំ ដោយគិតចាប់តាំងពីឆ្នាំ១៨៦៣មក។ រហូតដល់ថ្ងៃទី៩ ខែវិច្ឆិកា ឆ្នាំ១៩៥៣ ទើបកម្ពុជា ទទួលបានឯករាជ្យពេញបរិបូរពីបារាំងវិញ៕