ដោយសារអ៊ុយក្រែនព្យាយាមវាយប្រហារផ្លូវសំខាន់ៗឆ្លងកាត់ទន្លេ Dnipro ពីច្រាំងខាងកើតទៅខាងលិច រុស្ស៊ីនៅថ្ងៃទី៩ ខែវិច្ឆិកាបញ្ជាដកទ័ពចេញពីទីក្រុង Kherson ដោយអះអាងថា មិនអាចបន្តផ្គត់ផ្គង់អាវុធដល់ទ័ពខ្លួនបាន។ Kherson ជាទីក្រុងរដ្ឋបាលរបស់តំបន់ Kherson ដែលរុស្ស៊ីលេបយកដោយខុសច្បាប់កាលពីខែកញ្ញា ហើយទីក្រុងនេះស្ថិតនៅភាគខាងលិចនៃទន្លេ Dnipro ដែលបំបែកតំបន់ Kherson ជាពីរ។

 

«ដោយបានស្ទង់ប៉ាន់មើលស្ថានភាពបច្ចុប្បន្នគ្រប់ជ្រុងជ្រោយ វា (ការដកទ័ព) ត្រូវបានស្នើឡើងដើម្បីចាប់ផ្តើមការការពារតាមបណ្តោយច្រាំងខាងឆ្វេង(ភាគខាងកើត)នៃទន្លេ Dnipro»។ មេបញ្ជាការរុស្ស៊ីទទួលបន្ទុកកិច្ចការអ៊ុយក្រែន ឧត្តមសេនីយ៍ Sergei Surovikin ថ្លែងបែបនេះទៅកាន់រដ្ឋមន្រ្តីការពារជាតិ Sergei Shoigu ក្នុងការផ្សាយតាមទូរទស្សន៍។

 

បើតាមលោក Surovikin វាជាការសម្រេចចិត្តដ៏ពិបាកតែចាំបាច់បំផុតដើម្បីរក្សាអាយុជីវិតទាហានរុស្ស៊ី និងប្រសិទ្ធភាពប្រយុទ្ធរបស់កងទ័ពដែលគ្មានប្រយោជន៍ក្នុងការបន្តនៅភាគខាងលិចនៃទន្លេនោះទេ។ រដ្ឋមន្រ្តីការពារជាតិអ៊ុយក្រែនលោក Shoigu ក៏បានយល់ព្រមនឹងសំណើនេះ ហើយបញ្ជាឱ្យដកទ័ព ព្រមទាំងចាត់វិធានការទាំងអស់ដើម្បីផ្ទេរកងកម្លាំងឆ្លងកាត់ទន្លេទៅភាគខាងកើតវិញ។ 

 

យ៉ាងណាមិញ ​អ៊ុយក្រែនប្រតិកម្មចំពោះការដកទ័ពនេះយ៉ាងប្រុងប្រយ័ត្នដោយបញ្ជាក់ថា កងកម្លាំងអ៊ុយក្រែននៅតែមានវត្តមាននៅ Kherson ហើយកំពុងបង្កើនកម្លាំងបញ្ជូនទៅតំបន់នេះ។ 

 

«ពួកគេកំពុងចាកចេញ ប៉ុន្តែមិនច្រើនដូចនឹងអ្វីដែលនឹងកើតឡើងថាវាជាការដកចេញទាំងស្រុង ឬក៏រៀបចំក្រុមកម្លាំងឡើងវិញនោះទេ»។ ទីប្រឹក្សារបស់ប្រធានាធិបតីអ៊ុយក្រែន លោក Oleksiy Arestovych ថ្លែងក្នុងវីដេអូបែបនេះនាយប់ថ្ងៃទី៩ ខែវិច្ឆិកា។

 

លោក Arestovych សង្កត់ធ្ងន់ថា អំឡុងពេលនេះ ក្រុងកៀវនៅមិនច្បាស់ពីចេតនាថាតើក្រុងមូស្គូនឹងព្យាយាមក្តោបទីក្រុង Kherson ឬចូលប្រយុទ្ធជាមួយទ័ពអ៊ុយក្រែនទេ ពីព្រោះកងកម្លាំងទាំងនោះកំពុងដកថយយ៉ាងយឺត៕