លោក ប៊ុយ សោភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជា មើលឃើញពីសមត្ថភាពកីឡាករក្រុមជម្រើសជាតិកើនសិទ្ធផលគួរជាឱ្យកត់សម្គាល់ ទាំងការវាយ ការប្តូរកណ្តាប់ដៃ ការតស៊ូបានពេញ៥ទឹកនៅលើសង្វៀន បន្ទាប់ពីឆ្លងកាត់ការប្រកួតនៅប្រទេសហ្ស៊កដានី។

 

លោក សោភ័ណ្ឌ និយាយថា៖«បន្ទាប់ពីបញ្ចប់បេសកកម្មពីការប្រកួតកីឡាប្រដាល់សកលជើងឯកអាស៊ី គឺថាយើងអាចវាយតម្លៃបានថាសម្រាប់កីឡាករក្រុមជម្រើសជាតិកម្ពុជាយើង កើនឡើងគួរឱ្យកត់សម្គាល់។ ក្រៅពីនេះយើងបានរៀបចំការប្រកួតមិត្តភាពដកស្រង់បច្ចេកទេសជាមួយប្រទេសមួយចំនួនដែរដូចជា ហុងកុង, ជប៉ុន, តួកម៉េនីស្ថាន, អ៊ីរ៉ង់ និងប្រទេសផ្សេងៗ គឺយើងបានផ្តល់ឱកាសឱ្យក្រុមជម្រើសជាតិមានការប្រកួតបានច្រើន»។

 

លោក អគ្គលេខាធិការដដែលបានសង្កត់ធ្ងន់ថា ក្រៅតែពីចំនុចខាងទាំងអស់នេះហើយ ក្រុមជម្រើសជាតិកម្ពុជាក៏មានចំនុចខ្វះខាតមួយចំនួនដែលត្រូវពង្រឹងបន្ថែម គឺកម្លាំងហ្ស៊ូស និងបច្ចេកទេស ដើម្បីត្រៀមការប្រកួតកីឡាស៊ីហ្គេមនៅឆ្នាំ២០២៣។

 

គួរបញ្ជាក់ថា សហព័ន្ធកីឡាប្រដាល់សកលកម្ពុជា ក៏នឹងគ្រោងបញ្ជូនកីឡាករជម្រើសជាតិ៩រូបចេញទៅបោះជម្រុំហ្វឹកហាត់ និងប្រកួតសាកល្បងនៅប្រទេសកាហ្សាក់ស្ថាន, គុយបា និងប្រទេសមួយចំនួនផងដែរដើម្បីជាការត្រៀមខ្លួនឱ្យបានពេញលេញសម្រាប់ព្រឹត្តិការណ៍ប្រវត្តិសាស្ត្រដំបូងនៅកម្ពុជា ស៊ីហ្គេមលើកទី៣២៕