សន្និសីទ ស្តីពីការចែករំលែកព័ត៌មានឥណទាន ក្នុងតំបន់អាស៊ី សម្រាប់ប្រព័ន្ធរាយការណ៍ឥណទានឆ្លងព្រំដែន និងសន្តិសុខតាមប្រព័ន្ធអ៊ីនធឺណិត ដែលរៀបចំឡើងដោយធនាគារជាតិនៃកម្ពុជានេះ គឺបានផ្តល់នូវវេទិកាសាធារណៈ និងឯកជនកម្រិតអាស៊ី ដើម្បីឱ្យស្ថាប័នក្នុងតំបន់ ឈានឆ្ពោះទៅរកប្រព័ន្ធរាយការណ៍ឥណទានឆ្លងព្រំដែន និងការគ្រប់គ្រងហានិភ័យក្នុងយុគសម័យ នៃឌីជីថលនីយកម្មយ៉ាងឆាប់រហ័ស។

 

 

ក្នុងពិធីបើកសន្និសីទនេះ លោកស្រី អ៊ុក ម៉ាលី អគ្គទេសាភិបាលរងនៃធនាគារជាតិ​ បានថ្លែង ថា ៖ ប្រព័ន្ធចែករំលែកឥណទាន ជាហេដ្ឋារចនាសម្ព័ន្ធហិរញ្ញវត្ថុដ៏សំខាន់មួយដែលអាចអោយគ្រឹះស្ថានធនាគារនិងហិរញ្ញវ ត្ថុអាចវិភាគហានិភ័យនិងជំរុញបរិយាបន្នក្នុងប្រព័ន្ធហិរញ្ញវត្ថុ​​ ដែលជំរុញឱ្យទីផ្សារឥណទានដំណើរការកាន់តែមានប្រសិទ្ធភាពនិងថ្លៃដើមទាប។  លោកស្រី បានបញ្ជាក់ថា ៖«ធនាគារជាតិនៃកម្ពុជា​​បានធ្វើបច្ចុប្បន្នកម្មលើប្រកាសស្ដីពីការចែករំលែកព័ត៌មានឥណទានឆ្លងប្រទេសក្នុងឆ្នាំ២០២០សម្រាប់ធុរជនដែលមានអាជីវកម្មនៅបរទេសអាចមានលទ្ធភាពទទួលបានសេវាហិរញ្ញវត្ថុពីគ្រឹះស្ថានហិរញ្ញវត្ថុបរទេស»។​

 

ជាមួយនឹងកំណើនយ៉ាងឆាប់រហ័សនៃនិន្នាការសំខាន់ៗ​ដែលឈានទៅរកការចែករំលែកព័ត៌មានឥណទានឆ្លងប្រទេស​ ភាពបើកចំហនៃពាណិជ្ជកម្មអន្តរជាតិ និងវិនិយោគទន ភាពច្នៃប្រឌិតក្នុងប្រព័ន្ធហិរញ្ញវត្ថុឌីជីថល និងបទប្បញ្ញត្តិលើសហិគ្រិនភាព លោកស្រី ជា សិរី​ ឧបការីទេសាភិបាល និងជាប្រធានក្រុមប្រឹក្សាភិបាលនៃក្រុមហ៊ុនក្រេឌីត ប្យួរ៉ូ (ខេមបូឌា)​ បានលើកឡើងថា ភូមិសាស្ត្រនយោបាយក៏បានដើរតួយ៉ាងសំខាន់ក្នុងការជំរុញលើការចែករំលែកព័ត៌មានឥណទាន ផងដែរ។ លោកស្រី បន្តនិយាយដូច្នេះ៖ « ការចែករំលែកព័ត៌មានឥណទានឆ្លងប្រទេសនឹងអាចសម្រេចបានដោយមានការសហការចូលរួមពិគ្រោះយោបល់ក្នុងន័យស្ថាបនាសម្រាប់និងមានភាពជាក់លាក់ខ្ពស់ទាំងនៅក្នុងប្រទេសក៏ដូចជានៅក្រៅប្រទេស។​ ដូចនេះការបង្កើតឱ្យមាននូវក្រុមប្រឹក្សាពិគ្រោះយោបល់ នៃគណៈកម្មាធិការអន្តរជាតិនៃរបាយការណ៍ឥណទាន (ICCR) នឹងដើរតួយ៉ាងសំខាន់សម្រាប់បង្កើតអោយមានកិច្ចសហការរវាងប្រទេសកម្ពុជានិងប្រទេសដ៏ទៃក្នុងតំបន់»។ 

 

ក្នុងអំឡុងសន្និសីទ ថ្នាក់ដឹកនាំ និង​ អ្នកជំនាញបានគូសបញ្ជាក់ថា ការវិវត្តន៍នៃនិន្នាការលើការចែករំលែកទិន្នន័យនិងព័ត៌មានឥណទានឆ្លងប្រទេស​ គឺជួយជំរុញគ្នាទៅវិញទៅមក ជាពិសេសនៅក្នុងបរិបទនៃការកើនឡើងលើប្រព័ន្ធធនាគារបើកចំហ​ដែលជាកត្តាជំរុញដ៏សំខាន់ ដើម្បីជំនះឧបសគ្គនៃការធ្វើប្រតិបត្តិការចែករំលែកព័ត៌មានឥណទាន។​

 

លោក អឿ សុធារ័ត្ន ប្រធាននាយកប្រតិបត្តិក្រុមហ៊ុនក្រេឌីត ប្យួរ៉ូ (ខេមបូឌា)​ បាននិយាយថា៖

«នៅពេលដែលយើងឈានជើងចូលទៅក្នុងទសវត្សរ៍ទីពីរនៃរបាយការណ៍ឥណទាន នៅកម្ពុជា ផែនទី​បង្ហាញផ្លូវរបស់យើងផ្តោតលើការទាញយកទិន្នន័យជំនួស ដើម្បីឱ្យលទ្ធភាពទទួលបានហិរញ្ញប្បទាន ដល់​សហគ្រាស​ធុនតូច និងមធ្យម និងអ្នកខ្ចីឥណទានថ្មី ក៏ដូចជាការប្រើប្រាស់ប្រព័ន្ធ​ចែករំលែក​ព័ត៌មាន​ឥណទាន​ឆ្លងព្រំដែន ដោយសហការជាមួយក្រុមហ៊ុនឥណទានក្នុងតំបន់»។

 

ព្រឹត្តិការណ៍នេះបានទាក់ទាញភ្ញៀវអន្តរជាតិ ក៏ដូចជាអ្នកចូលរួមក្នុងស្រុក ដែលតំណាងឱ្យនិយតករ ក្រុមហ៊ុនឥណទាន ក៏ដូចជាស្ថាប័នហិរញ្ញវត្ថុមកពីតំបន់អាស៊ាន និងតំបន់អាស៊ី រួមមាន៖ ប្រទេសប៊ូតង់ នេប៉ាល់ ប៉ាគីស្ថាន និងកូរ៉េ ព្រមទាំងសហរដ្ឋអាមេរិកផងដែរ។ ពួក​គេ​បាន​ចូល​រួម​សន្និសីទ​មួយ​ថ្ងៃ​កន្លះ និងបន្ត​ដំណើរ​ទេសចរណ៍​ទៅកាន់ប្រាសាទ​អង្គរវត្ត។ សន្និសីទនេះទទួលបានការគាំទ្រយ៉ាងខ្លាំងពី វិស័យហិរញ្ញវត្ថុក្នុងស្រុក ដែលមាននាយកប្រតិបត្តិ និងនាយកប្រតិបត្តិជាន់ខ្ពស់ មកពីធនាគារធំៗ និងគ្រឹះស្ថានមីក្រូហិរញ្ញវត្ថុ​ចូលរួម​ក្នុង​សន្និសីទនេះផងដែរ។

 

សន្និសីទនេះត្រូវបានគាំទ្រ ដោយសាជីវកម្មហិរញ្ញវត្ថុអន្តរជាតិ (IFC) សមាគមឧស្សាហកម្មព័ត៌មានពាណិជ្ជកម្ម (BIIA) បណ្តាញរាយការណ៍ឥណទានអាស៊ី (ACRN) សមាគមធនាគារនៅកម្ពុជា (ABC) និង​សមាគមមីក្រូហិរញ្ញវត្ថុកម្ពុជា (CMA) អ្នកជំនាញជាន់ខ្ពស់មកពី គណៈកម្មាធិការអន្តរជាតិ​នៃរបាយការណ៍​ឥណទាន (ICCR) បានបង្ហាញ និងចែករំលែកចំណេះដឹង ពីអ្នក​​ជំនាញរបស់ពួកគេ លើនិន្នាការនាពេលខាងមុខ នៅក្នុងឧស្សាហកម្មប្រព័ន្ធចែករំលែកព័ត៌មានឥណទាន។

 

ផ្នែកទំនាក់ទំនង ធនាគារជាតិនៃកម្ពុជា

ទូរស័ព្ទ៖ (៨៥៥)​២៣ ៩៩០ ១៩៦ 

អ៊ីម៉ែល៖​ [email protected] 

 

ក្រុមហ៊ុន ក្រេឌីត ប្យួរ៉ូ (ខេមបូឌា) ខូ​ អិលធីឌី​

ទូរស័ព្ទ៖ (៨៥៥)​ ២៣៩៩៩​ ០០៦

អ៊ីម៉ែល៖​ [email protected]