រដ្ឋមន្ត្រីការពារជាតិឥណ្ឌូណេស៊ីនៅថ្ងៃទី២១ ខែវិច្ឆិកា លើកឡើងថា គម្រោងទិញយន្តហោះចម្បាំង F-15 ពីអាម៉េរិកស្ថិតក្នុងដំណាក់កាលចុងបញ្ចប់ ហើយកំពុងរង់ចាំការចុះហត្ថលេខាសម្រេចចុងក្រោយពីរដ្ឋាភិបាលឥណ្ឌូណេស៊ី។
កាលពីខែកុម្ភៈ ក្រសួងការបរទេសអាម៉េរិកបានអនុម័តលក់យន្តហោះ F-15 និងឧបករណ៍យោធាមួយចំនួនទៅឱ្យឥណ្ឌូណេស៊ីក្នុងកិច្ចព្រមព្រៀងដែលមានតម្លៃរហូតដល់១៣,៩ ពាន់លានដុល្លារ។
ដំណើរការទិញយន្តហោះរបស់ឥណ្ឌូណេស៊ីបានឈានដល់ដំណាក់កាលចុងក្រោយដែលរង់ចាំតែការចុះហត្ថលេខាពីរដ្ឋាភិបាលហ្សាការតាប៉ុណ្ណោះ។ នេះបើតាមការលើកឡើងរបស់រដ្ឋមន្ត្រីការពារជាតិឥណ្ឌូណេស៊ី លោក Prabowo Subianto បន្ទាប់ពីជួបសមភាគីអាម៉េរិកលោក Lloyd Austin នៅទីក្រុងហ្សាការតាថ្ងៃទី២១ ខែវិច្ឆិកា។
«ការសម្រេចចិត្តពេលនេះ ស្ថិតនៅលើរដ្ឋាភិបាលឥណ្ឌូណេស៊ី ខណៈការចរចាបានឈានទៅមុខយ៉ាងល្អ»។ លោក Prabowo លើកឡើងបែបនេះក្នុងសន្និសីទសារព័ត៌មានក្រោយជំនួប។
យន្តហោះ F-15 ជាយន្តហោះចម្បាំងផលិតដោយអាម៉េរិកមានម៉ាស៊ីនភ្លោះ និងអាចប្រើបានទាំងពេលយប់ ឬពេលមានអាកាសធាតុមិនល្អ។ វាស្ថិតក្នុងចំណោមយន្តហោះចម្បាំងទំនើបដែលទទួលបានជោគជ័យច្រើនបំផុតក្នុងសមរភូមិ។
បើតាមទីភ្នាក់ងារព័ត៌មាន Reuters ឥណ្ឌូណេស៊ីក៏កំពុងស្វែងរកការជួសជុលយន្តហោះចាស់ៗរបស់ខ្លួន រួមមានយន្តហោះ F-16 ដែលផលិតដោយអាម៉េរិក និងយន្តហោះចម្បាំងរុស្ស៊ី Sukhoi Su-27 និង Su-30។
រដ្ឋមន្ត្រីការពារជាតិអាម៉េរិក លោក Austin លើកឡើងថាអាម៉េរិកពិតជាគាំទ្រដល់ការប្រឹងប្រែងរបស់រដ្ឋមន្ត្រីឥណ្ឌូណេស៊ីដែលបន្តធ្វើទំនើបកម្មប្រព័ន្ធការពារ និងសមត្ថភាពយោធាក្នុងប្រទេស ហើយអាម៉េរិកនឹងបន្តជួយគ្រប់មធ្យោបាយដែលអាចធ្វើបាន។
កាលពីដើមឆ្នាំ២០២២ ឥណ្ឌូណេស៊ី និងអាម៉េរិកបានចូលរួមធ្វើសមយុទ្ធ Super Garuda Shield រួមគ្នាក្នុងគោលបំណងបង្កើន និងពង្រឹងសមត្ថភាពប្រយុទ្ធក្នុងព្រៃរបស់កងទ័ពប្រទេសទាំងពីរ។ ជំនួបរវាងរដ្ឋមន្ត្រីការពារជាតិអាម៉េរិក និងឥណ្ឌូណេស៊ី ធ្វើឡើងខណៈអាម៉េរិកចង់ពង្រឹងទំនាក់ទំនងរបស់ខ្លួនជាមួយបណ្តាប្រទេសក្នុងតំបន់អាស៊ី។
ទោះយ៉ាងណា លោក Prabowo អះអាងថាឥណ្ឌូណេស៊ីប្តេជ្ញាចិត្តចំពោះគោលនយោបាយមិនចូលបក្សសម្ពន្ធ ហើយចង់រក្សាទំនាក់ទំនងល្អជាមួយទាំងចិន និងអាម៉េរិក ស្របពេលភាពតានតឹងនៅតំបន់ឥណ្ឌូប៉ាស៊ីហ្វិកកើនឡើង៕