ប្រធានាធិបតីទីម័រខាងកើត លោក José Ramos-Horta បានធ្វើទស្សនកិច្ចនៅសិង្ហបុរីចាប់ពីថ្ងៃទី៦ ដល់ថ្ងៃទី១១ ខែធ្នូ។ លោក Ramos-Horta នៅថ្ងៃទី៨ ខែធ្នូ បានជួបជាមួយនាយករដ្ឋមន្ត្រីសិង្ហបុរី លោក លី ស៊ានឡុង និងប្រធានាធិបតី លោកស្រី Halimah Yacob។ ក្នុងអំឡុងកិច្ចប្រជុំ មេដឹកនាំសិង្ហបុរី និងទីម័រខាងកើតបានបង្ហាញពីទំនាក់ទំនងដ៏កក់ក្តៅ និងយូរអង្វែងរវាងគ្នា ដែលមានតាំងពីមុនពេលទីម័រខាងកើតទទួលបានឯករាជ្យ។ 
 

លោកស្រី Halimah និងលោក លី បានបញ្ជាក់ពីការប្តេជ្ញាចិត្តរបស់សិង្ហបុរីគាំទ្រដល់ការអភិវឌ្ឍរបស់ទីម័រខាងកើតដើម្បីត្រៀមខ្លួនក្លាយជាសមាជិកពេគសិទ្ធិអាស៊ាន តាមរយៈកម្មវិធីបណ្ដុះបណ្ដាលពង្រឹងសមត្ថភាព និងស្វាគមន៍មន្ត្រីទីម័រឡេស្តេដើម្បីចូលរួមក្នុងកម្មវិធីកិច្ចសហប្រតិបត្តិការសិង្ហបុរី ដែលជាវេទិការដ៏លេចធ្លោមួយសម្រាប់ពង្រឹងជំនួយបច្ចេកទេសដល់ប្រទេសកំពុងអភិវឌ្ឍ។ នេះបើតាមសេចក្ដីប្រកាសរបស់ក្រសួងការបរទេសសិង្ហបុរី។
 

សេចក្ដីប្រកាសដដែលបន្ថែមថា បុរីរដ្ឋនេះនឹងជួយបណ្តុះបណ្តាលមន្ត្រីទីម័រខាងកើតជាង៣០០នាក់ តាមរយៈការផ្ដល់កញ្ចប់ជំនួយបច្ចេកទេសពិសេស (STARS) ដើម្បីមានលទ្ធភាពគ្រប់គ្រាន់ធ្វើជាសមាជិកអាស៊ាន។ 
 

ក្នុងនោះ មន្ត្រីទីម័រខាងកើតជាង២០០នាក់នឹងទទួលបានវគ្គសិក្សាស្តីពីការទំនាក់ទំនងភាសាអង់គ្លេស ការកត់ត្រា និងការសរសេររបាយការណ៍ ព្រមទាំងជំនាញចរចាទៀតផង។ គ្រូបង្រៀន អ្នកគ្រប់គ្រងសាលា និងមន្ត្រីក្នុងវិស័យអប់រំរបស់ទីម័រខាងកើតប្រមាណ១០០នាក់ ក៏នឹងត្រូវទទួលបានការបណ្តុះបណ្តាល ដើម្បីបង្កើតប្រព័ន្ធអប់រំក្នុងប្រទេសសម្រាប់ក្មេងៗជំនាន់ក្រោយឱ្យចូលរួមក្នុងសហគមន៍អាស៊ានផងដែរ។ 
 

នាយករដ្ឋមន្ត្រីសិង្ហបុរី ក៏បានបញ្ជាក់ពីគោលជំហរគាំទ្ររបស់ខ្លួនចំពោះទីម័រខាងកើត និងការប្តេជ្ញាចិត្តធ្វើការជាមួយប្រទេសសមាជិកផ្សេងទៀតលើផែនទីបង្ហាញផ្លូវសម្រាប់សមាជិកភាពពេញសិទ្ធិនៅអាស៊ានរបស់ទីម័រខាងកើតនៅឆ្នាំ២០២៣។
 

គួរបញ្ជាក់ថា ទីម័រឡេស្តេនៅថ្ងៃទី១១ ខែវិច្ឆិកា បានចូលជាសមាជិកអាស៊ានទី១១ ដោយមានឋានៈជាប្រទេសសង្កេតការណ៍ និងឈានទៅរកការក្លាយជាសមាជិកពេញសិទ្ធិនៅឆ្នាំខាងមុខ៕