ជាតិ
សម្ដេច ហ៊ុន សែន រំពឹងថាកម្ពុជាអាចទទួលបានទេសចរផ្ទៃក្នុងប្រមាណ ១១លាននាក់ នៅឆ្នាំ២០២៣
×![]()
ភ្នំពេញ៖ នាយករដ្ឋមន្រ្តីកម្ពុជា សម្ដេច ហ៊ុន សែន រំពឹងថាកម្ពុជាអាចទទួលបានភ្ញៀវទេសចរផ្ទៃក្នុងប្រមាណ ១១លាននាក់ ក្នុងឆ្នាំ២០២៣ តាមផែនការដែលបានដាក់ចេញ។ ដោយឡែក សម្រាប់ភ្ញៀវទេសចរអន្តរជាតិវិញ សម្ដេច រំពឹងថាអាចមានប្រមាណ ៧លាននាក់ រហូតដល់ឆ្នាំ២០២៦ ឬឆ្នាំ២០២៧។
ដើម្បីជំរុញការស្ដារ និងលើកស្ទួយវិស័យទេសចរណ៍ រដ្ឋាភិបាលកម្ពុជា បានអនុម័តដាក់ឱ្យប្រើប្រាស់នូវផែនទីចង្អុលផ្លូវស្ដីពីផែនការស្ដារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិកូវីដ-១៩។ ក្នុងផែនទីនោះ ទេសចរណ៍ឆ្នេរ គឺជាសសរស្ដម្ភមួយក្នុងចំណោមសសរស្ដម្ភទាំង៤ រួមមានទេសចរណ៍វប្បធម៌, ទេសចរណ៍ឆ្នេរ, អេកូទេសចរណ៍ និងភាពជាខ្មែរ។
ក្នុងពិធីបើកមហាសន្និបាតលើកទី១៦ នៃក្លឹបឆ្នេរសមុទ្រដែលស្អាតបំផុតលើសកលលោក នាខេត្តព្រះសីហនុ នៅព្រឹកថ្ងៃទី១០ ធ្នូនេះ សម្ដេច ហ៊ុន សែន មានប្រសាសន៍យ៉ាងដូច្នេះ៖ «ឈរលើមូលដ្ឋានទាំងអស់នេះ យើងរំពឹងថាអាចទទួលបានភ្ញៀវទេសចរផ្ទៃក្នុងប្រមាណ ១១លាននាក់ ក្នុងឆ្នាំ២០២៣ តាមផែនការដែលបានដាក់ចេញ និងភ្ញៀវទេសចរអន្តរជាតិប្រមាណ ៧លាននាក់ រហូតដល់ឆ្នាំ២០២៦ ឬឆ្នាំ២០២៧»។
បើតាមសម្ដេចនាយករដ្ឋមន្រ្តី ក្នុងរយៈពេលជិត ៣ឆ្នាំមកនេះ កម្ពុជាមានសេចក្ដីរីករាយ ដែលពិភពលោកខិតខំប្រឹងប្រែង និងរួមគ្នាជាធ្លុងមួយ ក្នុងការឆ្លើយតបប្រកបដោយប្រសិទ្ធភាពខ្ពស់ចំពោះការរាតត្បាតជំងឺកូវីដ-១៩។ សម្ដេច បន្តថា ការជួយគ្នាទៅវិញទៅមកនេះ បានធ្វើឱ្យទទួលបាននូវជ័យជម្នះ រហូតឈានដល់ការបើកប្រទេស និងចាប់ផ្ដើមស្ដារសេដ្ឋកិច្ចរៀងៗខ្លួនឡើងវិញ។
អត្ថបទទាក់ទង
សូមបញ្ជាក់ថា នៅថ្ងៃទី៩-១១ ធ្នូនេះ កម្ពុជាបានធ្វើជាម្ចាស់ផ្ទះមហាសន្និបាតលើកទី១៦ នៃក្លឹបឆ្នេរសមុទ្រដែលស្អាតបំផុតលើសកលលោក ខណៈពេលដែលខេត្តព្រះសីហនុ ប្រារព្ធពិធីបុណ្យសមុទ្រលើកទី៩ ជុំទី៣។ ព្រឹត្តិការណ៍បុណ្យសមុទ្រឆ្នាំ២០២២នេះ មានកម្មវិធីកម្សាន្តសប្បាយជាច្រើន ជាពិសេសការប្រគំតន្រ្តី សកម្មភាពកីឡា រួមទាំងការតាំងពិព័រណ៍ផលិតផលជាដើម៕
Tag:
ទេសចរណ៍
ហ៊ុន សែន
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
