យោងទៅលើការផ្សាយរបស់ CAMBODIA 2023 ថ្ងៃទី១៩ ខែធ្នូ លោក Osoth Bhavilai បានមកទស្សនកិច្ចពហុកីឡដ្ឋានជាតិមរតកតេជោ ដោយរួមដំណើរជាមួយប្រតិភូថ្នាក់ដឹកនាំ និងមន្ដ្រីបច្ចេកទេសនៃ APSF។ ក្នុងដំណើរទស្សនកិច្ចនេះ ប្រធាន APSF បានបង្ហាញពីចំណុចវិជ្ជមាន ចំពោះការត្រៀមខ្លួន បានយ៉ាងល្អរបស់កម្ពុជា និងការព្រួយបារម្ភមួយចំនួន។ លោក Osoth Bhavilai ចាត់ទុកថាការរៀបចំភូមិកីឡា នៅជិតទីលានប្រកួត ជាការសម្រួលដល់ការធ្វើដំណើររបស់អត្ដពលិក ដែលមានពិការរភាព។
  

 

«ការត្រួតពិនិត្យគ្រប់ទីលានប្រកួត បើទោះបីជាមានទីលានខ្លះជួសជុលឡើងវិញ ប៉ុន្តែវាបន្តិចបន្តួចប៉ុណ្ណោះ។ អ្វីដែលប្រសើរនោះគឺវានៅកៀកកន្លែងស្នាក់នៅដែលអត្តពលិកអាចធ្វើដំណើរដោយថ្មើរជើងទៅទីលានប្រកួតដោយងាយស្រួល។ នេះគឺជាអ្វីដែលយើងបានឃើញ»។ លោក Osoth Bhavilai បានបង្ហាញសុទិដ្ឋិនិយមដូច្នេះ។
 

ជាមួយសុទិដ្ឋិនិយមនេះ ប្រធានសហព័ន្ធ APSF ក៏បានបង្ហាញពីក្តីបារម្ភផងដែរ ចំពោះជណ្ដើរយន្ដ និងទំហំទ្វារបន្ទប់ទឹក សម្រាប់អត្ដពលិកប៉ារ៉ាឡាំកពិក ដែលត្រូវយកចិត្តទុកដាក់យ៉ាងខ្លាំង។ 
 

លោក Osoth Bhavilai និយាយដូច្នេះថា៖«យើងព្រួយបារម្ភអំពីជណ្ដើរយន្ត។ ថាតើមានជណ្ដើរយន្ដប៉ុន្មាន? ទោះបីជាយ៉ាងណា ដោយសារភូមិកីឡានៅជិតទីតាំងប្រកួត ដូច្នេះយើងមិនចាំបាច់មានការដឹកជញ្ជូនពីកន្លែងមួយទៅកន្លែងមួយទេ។ ពួកគាត់មួយចំនួនអាចធ្វើដំណើរថ្មើរជើងពីភូមិកីឡា ទៅទីលានប្រកួតបាន។ បញ្ហាព្រួយបារម្ភមួយទៀតរបស់យើងគឺបញ្ហាទំហំទ្វារបន្ទប់ទឹក។ ថាតើរទេះរបស់អត្តពលិកអាចចូលបាន ឬយ៉ាងណា ពីព្រោះយើងមិនទាន់បានឃើញនៅឡើយ ដូច្នេះយើងសង្ឃឹមថាបានឃើញទំហំទ្វារស្ដង់ដា»។
 

គួរបញ្ជាក់ផងដែរ កម្ពុជា នឹងធ្វើជាម្ចាស់ផ្ទះ អាស៊ានប៉ារ៉ាហ្គេម លើកទី១២ នៅថ្ងៃទី៣-៩ ខែមិថុនា ឆ្នាំ២០២៣។ ប្រទេសម្ចាស់ផ្ទះ បានសម្រេចដាក់ ១៣ប្រភេទកីឡា ក្នុងព្រឹត្តិការណ៍នោះ។ កីឡា ១៣ប្រភេទនោះមាន៖ កីឡាអត្តពលកម្មជនពិការ, កីឡាហែលទឹកជនពិការ, កីឡាបូស្យាជនពិការ, កីឡាវាយសីជនពិការ, កីឡាបាល់ទាត់ ៥ម្ខាង, កីឡាបាល់ទាត់ ៧ម្ខាង, កីឡាលើកទម្ងន់ជនពិការ, កីឡាបាល់បោះជិះរទេះជនពិការ, កីឡាវាយកូនឃ្លីលើតុជនពិការ, កីឡាបាល់បោះជនពិការភ្នែក, , កីឡាបាល់ទះអង្គុយ,កីឡាអុក និងកីឡាយូដូជនពិការ៕