ទោះបីបិទបញ្ចប់ព្រឹត្តិការណ៍កីឡាជាតិ កាលពីខែវិច្ឆិកា កន្លងទៅហើយក្តី តែអត្តពលិកកីឡាទ្រីយ៉ាត្លុង នៅតែបន្តហ្វឹកហាត់យ៉ាងសស្រាក់សស្រាំ ទាំងកម្លាំងកាយ និងបច្ចេកទេស ដែលជាគោលដៅឆ្ពោះទៅព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣ ខាងមុខ។

 

 

លោក ងិន សុខបញ្ញា ប្រាប់សារព័ត៌មានថ្មីៗថា កីឡាទ្រីយ៉ាត្លុងមើលឃើញផលវិជ្ជមានលើសមត្ថភាពកីឡាករ-កីឡាការិនីជម្រើសជាតិកម្ពុជា ដែលហ្វឹកហាត់នៅទីតាំងមានស្រាប់ក្នុងខេត្តកែប។ 

លោក ងិន សុខបញ្ញា និយាយថា៖«បច្ចេកទេស ពិសេសកម្លាំងកាយពួកគាត់កើនឡើងជាងមុនបន្តិច ព្រោះគាត់អាចប្រកួត៣ថ្ងៃជាប់ៗគ្នា ដែលយើងមិនធ្លាប់ប្រកួត ដោយសារយើងបានហាត់សមសម្របទៅនឹងទីលានប្រកួត ព្រោះក្រុមយើងហ្វឹកហាត់ និងស្នាក់នៅខេត្តកែបយូរមកហើយ។ វាមានសារសំខាន់ ដើម្បីបំពេញសម្រាប់ស៊ីហ្គេម»។

 

គួរបញ្ជាក់ថា ក្រុមជម្រើសជាតិកីឡាទ្រីយ៉ាត្លុងកម្ពុជា បោះជម្រុំហ្វឹកហាត់នៅទីតាំងខេត្តកែប បានរយៈពេល១១ខែ និង២៤ថ្ងៃ ដោយគ្រូបង្វឹក៤នាក់ កីឡាករ៥នាក់ និងកីឡាការិនីនាក់ ៥នាក់៕