កីឡាការិនី ខេន ម៉ាឡៃ ជាម្ចាស់មេដាយមាស ក្នុងព្រឹត្តិការណ៍កីឡាទោចក្រយានជ្រើសរើសជើងឯក ឆ្នាំ២០២២ លើវិញ្ញាសាកង់ភ្នំនារី (ចម្ងាយ១៦គីឡូម៉ែត្រ) ដែលបានបិទបញ្ចប់នៅថ្ងៃទី២៧ ខែធ្នូ ឆ្នាំ២០២២ នៅខេត្តសៀមរាប។

 

ម្ចាស់មេដាយមាស ឆ្នាំ២០២២ និងជាកីឡាការិនីជម្រើសជាតិកម្ពុជា រូបនេះ ទទួលស្គាល់ថា ការប្រកួតកីឡាទោចក្រយាន លើវិញ្ញាសាកង់ភ្នំ មិនមែនជារឿងងាយស្រួលឡើយ ខណៈអត្តពលិកទាំងអស់ ត្រូវមានបច្ចេកទេសខ្ពស់ ក្នុងការប្រកួតប្រជែងយកឈ្នះគូប្រកួតខ្លួន។

 

 

ថ្លែងប្រាប់សារព័ត៌មានថ្មីៗ ខេន ម៉ាឡៃ បាននិយាយថា ៖«សម្រាប់ទីតាំងការប្រកួតអាចនិយាយបានថាពិបាកក៏មិនពិបាក ស្រួលក៏មិនស្រួល ផ្លូវហ្នឹងបច្ចេកទេសច្រើនមានឡើងចុះបត់បែនច្រើន។ មុននឹងឈានដល់មេដាយមាស យើងមានការហ្វឹកហាត់ប្រចាំថ្ងៃដោយមានការទម្លាក់ផែនការពីគ្រូបង្វឹក និងបានកែនូវអ្វីដែលខ្វះខាត ហើយត្រូវបំពេញបន្ថែម»។

 

ស្របពេលខ្លួន សម្រេចបានជោគជ័យបែបនេះ ម៉ាឡៃ ក៏ចង់ឃើញស្ត្រីដទៃចូលរួមប្រកួតកីឡាទោចក្រយាននេះ ឱ្យបានច្រើន បើទោះជាមានផលលំបាកក្តី។«សម្រាប់កីឡាកង់ បើយើងងាកមកមើល គឺអត់សូវមានស្រ្តីចូលរួមលេងច្រើនទេ ខ្ញុំចង់ឃើញស្រី្តចូលរួមលេងឱ្យបានច្រើនដូចជាបណ្តាប្រទេសនៅខាងក្រៅ»។ នេះជាការលើកឡើងរបស់ ខេន ម៉ាឡៃ។

 

ក្រៅពីឈ្នះមេដាយមាស ក្នុងព្រឹត្តិការណ៍កីឡាទោចក្រយានជ្រើសរើសជើងឯក ឆ្នាំ២០២២នេះហើយ ខេន ម៉ាឡៃ ក៏ប្ដេជ្ញាប្រឹងប្រែងហ្វឹកហាត់ថែមទៀត ដើម្បីដុសខាត់ចំណុចខ្វះខាត ជាពិសេសសំលៀងសមត្ថភាព និងបច្ចេកទេសខ្លួន ឱ្យបានមុតស្រួច សម្រាប់ព្រឹត្តិការណ៍ស៊ីហ្គេម២០២៣ ដែលកម្ពុជាធ្វើជាម្ចាស់ផ្ទះ។

 

ម៉ាឡៃ និយាយថា៖«សម្រាប់ខ្ញុំត្រៀមលក្ខណៈរួចរាល់ ដើម្បីនាំលទ្ធផលល្អជូនជាតិ ជូនក្រុម និងគ្រួសារ។ ដោយផ្តោតសំខាន់លើការហ្វឹកហាត់ជាប្រចាំ និងស្តាប់ការណែនាំរបស់គ្រូបង្វឹក»៕