ថ្វីដ្បិតចាញ់កីឡាករជើងចាស់ប្រចាំសង្វៀននៃព្រះរាជាណាចក្រថៃ (Thai Fight) តែអ្នកប្រដាល់កណ្តាប់ដៃតាន់ អេលីត ហ៊ុនកង នៅចង់ឡើងប្រកួតនៅ Thai Fight ម្តងទៀត។ ចំពោះភាពជឿជាក់របស់ខ្លួន ហ៊ុនកង បញ្ជាក់ថា ប្រសិនបើមានការប្រកួតពេលក្រោយខ្លួនសុំប្តូរការប្រកួតពីការពាក់ស្រោមដៃ ទៅជាវាយរុំអំបោះឆៅវិញម្តង។ 


ការប្រកួតរវាងកីឡាករកម្ពុជា អេលីត ហ៊ុនកង(ខោស) និងកីឡាករថៃ ភីឃេ សែនឆៃ(ខោខ្មៅ)។ រូបពី Seanchai
 

ឆ្លើយនឹងសំនួររបស់អ្នកសារព័ត៌មានថ្មីៗ ថាតើហេតុអ្វី ហ៊ុនកង ចង់ប្រកួតដោយវាយរុំអំបោះឆៅ? កីឡាករ អេលីត ហ៊ុនកង ឆ្លើយថា៖«បាទ!ដោយសារតែខ្ញុំធ្លាប់វាយ MMA អ៊ីចឹងអំបោះឆៅគឺស្រួលជាងវាយពាក់ស្រោមដៃ។ អំបោះឆៅបើយើងវាយចូលពេញ គូប្រកួតអាចស្រុតតែម្តង តែបើមានស្រោមដៃទោះបីចូលពេញ ក៏អត់សូវមានគុណភាពដែរ ហើយណាមួយខ្ញុំអត់សូវខ្លាចវាយប្តូរកណ្តាប់ដៃទេ»។

 

យ៉ាងណា អេលីត ហ៊ុនកង ក៏បានបកស្រាយជុំវិញការភ្លាត់ស្នៀតរបស់ខ្លួនដោយរងជើងរន្ទះផ្កាប់ចានរបស់ សែនឆៃ ដែលបណ្តាលឱ្យខ្លួនសន្លប់ក្នុងទឹកទី២ ខណៈខ្លួនខំប្រឹងក្រោកឡើងដែរតែមួយជើងរបស់ ភីឃេ សែនឆៃ ធ្ងន់ពេក។

 

ហ៊ុនកង បន្តថា៖«សម្រាប់ខ្ញុំប្រកួតជាមួយ សែនឆៃ ដៃរបស់គាត់ស្រាលទេ តែជើងរបស់គាត់ធ្ងន់ គាត់ទាត់ចំករខ្ញុំ ធ្វើឱ្យខ្ញុំសន្លប់ បើនិយាយកណ្តាប់ដៃគាត់មិនចូលចុះខ្ញុំទេ។ គាត់ដឹងពីខ្ញុំ គាត់ព្យាយាមវាយដកឃ្លាពីខ្ញុំ»៕