គណៈកម្មការអចិន្ត្រៃ នៃគណៈកម្មាធិការជាតិរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ បានកំណត់គោលដៅជាក់លាក់រៀបរយក្នុងការរៀបចំកម្មវិធី«Cambodia Ready For Seagames 2023» ដែលនឹងធ្វើឡើងនៅថ្ងៃទី២៥ ខែមករា នៅពហុកីឡដ្ឋានជាតិមរតកតេជោ។

 

លោក វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC បានមានប្រសាសន៍ថា ទាំងការរៀបចំតុបតែងតាមដងផ្លូវពីព្រលានយន្តហោះអន្តរជាតិភ្នំពេញ ទៅតាមទីសាធារណៈនានាដើម្បីផ្សព្វផ្សាយអំពីស៊ីហ្គេម នឹងត្រូវឱ្យបានរួចរាល់មុនកម្មវិធីរាប់ថយក្រោយ ១០០ថ្ងៃ នៃការមកដល់ព្រឹត្តិការណ៍កីឡាស៊ីហ្គេម ២០២៣។

 

លោក វ៉ាត់ ចំរើន បន្តថា៖«អ្វីដែលយើងទទួលបានពីប្រធានបទនៅថ្ងៃនេះគឺមានសារសំខាន់ណាស់។ យើងមានវឌ្ឍនភាពល្អ គួរជាទីមោទនៈ ដែលអាចរៀបចំពិធី១០០ថ្ងៃរាប់ថយក្រោយ នៅថ្ងៃទី២៥ ខែមករា ឆ្នាំ២០២៣។ នេះគឺជាការរាប់ថយក្រោយ ដែលកម្ពុជាពិតជាអាចបង្ហាញនូវវឌ្ឍនភាពថា «Cambodia is Ready To Seagames» ដែលកម្ពុជារួចរាល់សម្រាប់ស៊ីហ្គេម»៕