«12 Motor Park នឹងជ្រើសរើសអ្នកដែលមានសមត្ថភាពពិតប្រាកដ ដើម្បីជំរុញឱ្យកីឡាករដែលមានសមត្ថភាព មានលទ្ធភាពដែលអាចទៅប្រកួតប្រជែងនៅក្រៅប្រទេសបាន ហើយសង្ឃឹមថាកូនខ្មែរយើងអាចឈ្នះពានពីក្រៅប្រទេសមកវិញ»។ លោក ឈឹម នរិន្ទ និយាយដូច្នេះ។

 

 

ថ្វីដ្បិតការរៀបចំកម្មវិធីប្រកួតកីឡាប្រណាំងម៉ូតូភ្នំ(Enduro cross challenge 2023) ជាលើកដំបូងក៏ពិតមែនតែស្ថាបនិករៀបចំកម្មវិធីប្រកួតរូបនេះ មានអារម្មណ៍សប្បាយចិត្តជាខ្លាំងដែលអាចដំណើរការបានទៅដោយរលូន រួមទាំងមានការចូលរួមលើកទឹកចិត្តពីរដ្ឋបាលខេត្តមណ្ឌលគិរីផង។

 

ជាមួយនឹងភាពកក់ក្តៅ និងភាពរីករាយលោក ឈឹម នរិន្ទ ក៏បានបញ្ជាក់ផងដែរថាការប្រកួតក៏នៅមានចំនុចមួយចំនួនជាផលវិបាកសម្រាប់ការរៀបចំលើកដំបូងនេះ ពិសេសការធ្វើដំណើរដែលមានចម្ងាយឆ្ងាយសម្រាប់កីឡាករមួយចំនួន។

 

លោក ឈឹម នរិន្ទ បន្តថា៖«សម្រាប់ដំបូងនេះមានការលំបាកខ្លះដែរ ដោយសារផ្លូវឆ្ងាយសម្រាប់កីឡាករដែលត្រូវចំណាយពេល៥ ទៅ៦ម៉ោងបានទៅដល់ទីតាំងប្រកួត»។ តែយ៉ាងណាជាមួយគ្នានោះដែរ លោក នរិន្ទ បន្ថែមថា ក្តីលំបាករបស់កីឡាករ លោកក៏បានជួយដោះស្រាយខ្លះៗ ទាក់ទងទៅនឹងការប្រកួតដោយសម្រួលការប្រណាំងធ្វើតែមួយថ្ងៃប៉ុណ្ណោះ។

 

ការប្រកួតកីឡាប្រណាំងម៉ូតូភ្នំ (12 Motor Park Enduro cross challenge 2023) នឹងធ្វើនៅថ្ងៃទី១៣-១៥ ខែមករា ក្នុងខេត្តមណ្ឌលគីរី មានរយៈចម្ងាយផ្លូវនៃការប្រកួត ២០គីឡូម៉ែត្រ ដែលមានកីឡាករចូលរួមប្រកួតចំនួន៨០នាក់ មកពីបណ្តាប្រទេសមួយចំនួនដូចជា កម្ពុជា កូរ៉េខាងត្បូង ថៃ វៀតណាម ជាដើម៕