របាយការណ៍ដែលចេញដោយក្រសួងសេដ្ឋកិច្ច ​និង ហិរញ្ញវត្ថុ នាថ្ងៃទី៤មករា បានបង្ហាញថា ចាប់ពីខែមករា ដល់ខែវិច្ឆិកា ឆ្នាំ២០២២ កម្ពុជាទទួលបានចំណូលពីអាករលើតម្លៃបន្ថែមចំនួន ​៦​ ៣៦០ ០៦២លានរៀល(ប្រមាណ១ ៥៤០លានដុល្លារ)។ ចំណូលដែលប្រមូលបាននេះគឺស្មើនឹង៩២,០៥នៃផែនការប្រចាំឆ្នាំ២០២២។ 

 

ក្រសួងសេដ្ឋកិច្ច​​បានរៀបរាប់ថា ក្នុងខែមករាអគ្គនាយកដ្ឋានពន្ធដារប្រមូលអាករលើតម្លៃបន្ថែមចូលថវិកាជាតិបានប្រមាណ១៣១លានដុល្លារ, ខែកុម្ភៈប្រមូលបានជិត១១៤លានដុល្លារ, ខែមីនាប្រមូលបានជិត១៤១លានដុល្លារ។ ប្រចាំខែមេសា រដ្ឋប្រមូលអាករលើតម្លៃបន្ថែមបានជាង ១៣៥លានដុល្លារ, ខែឧសភាប្រមូលបានជាង១៤១លានដុល្លារ, ខែមិថុនាប្រមូលបានដល់ជាង១៥៧លានដុល្លារ។ 

 

សម្រាប់ខែកក្កដា ឆ្នាំ២០២២ រដ្ឋប្រមូលអាករលើតម្លៃបន្ថែមនៃទំនិញនិងសេវាប្រើប្រាស់បានជាង១៤៤លានដុល្លារ, ខែសីហាប្រមូលបានជិត១៥០លានដុល្លារ, ខែកញ្ញាប្រមូលបានជាង១៤២លានដុល្លារ, ខែតុលាប្រមូលបានជាង១៤៨លានដុល្លារ និងខែវិច្ឆិកា រដ្ឋប្រមូលបានជាង ១៤៥លានដុល្លារ ផងដែរ។

 

សូមជម្រាបថា រយៈពេល១១ខែ ឆ្នាំ២០២២មកនេះ អគ្គនាយកដ្ឋានពន្ធដារ​ប្រមូលពន្ធ-អាករគ្រប់ប្រភេទចូលជាតិ​បាន ៣ ២១៤,០៦លានដុល្លារ។ ចំណូលនេះគឺស្មើនឹង១១៣,៩៩ភាគរយ នៃផែនការច្បាប់ស្តីពីហិរញ្ញវត្ថុប្រចាំ២០២២ ធៀបនឹងចូលពន្ធ-អាករ ឆ្នាំ២០២១។ នេះបើតាមអគ្គនាយកដ្ឋានពន្ធដារ៕​

​