ជម្នះការហាមឃាត់ពីឪពុកម្តាយ ដោយសារខ្លួនជាស្រ្តីភេទ កញ្ញា វី ស្រីស្រស់ នៅតែអាចសម្រេចក្តីប្រាថ្នារបស់ខ្លួនបាន។ ពីការហ្វឹកហាត់ធម្មតា ប្រែក្លាយជាកីឡាការិនីប្រដាល់សកលជម្រើសជាតិកម្ពុជា ស្រីស្រស់ដែលមានមាឌមាំមួនអំណោយផលពីកំណើត បានសម្រេចបំណង និងថែមទាំងទទួលការជំរុញពីឪពុកម្តាយថែមទៀត។

 

កីឡាការិនី វី ស្រីស្រស់ ដែលមានកណ្តាប់ដៃធ្ងន់ក្នុងការវាយចេញទៅកាន់គូប្រកួត បានត្រៀមលក្ខណរួចរាល់ជាស្រេចមុនដំណើរមកដល់នៃព្រឹត្តិការណ៍ប្រវត្តិសាស្រ្តរបស់កម្ពុជា ឆ្នាំ២០២៣។ ជាមួយនឹងទឹកមុខញញឹមរីករាយ និងមានភាពស្រស់ស្រាយ ស្រីស្រស់ ថាការហ្វឹកហាត់របស់ខ្លួនបានពេញលេញ មិនមានការលំបាកអ្វីខ្លាំងនោះទេ។ សម្រាប់ការហ្វឹកហាត់ ស្រីស្រស់ មិនសូវជាមានផលលំបាកនោះទេ និងមានពេលហាត់ទៀងទាត់ ទាំងពេលព្រឹក និងល្ងាច។ 

 

ស្របពេលជាមួយនឹងការខិតខំប្រឹងប្រែងហ្វឹកហាត់នោះដែរ គួបផ្សំជាមួយទំនុកចិត្ត កីឡាការិនីប្រដាល់សកល ស្រីស្រស់ មានក្តីរំពឹងខ្ពស់ថានឹងដណ្តើមមេដាយស៊ីហ្គេម២០២៣ ជូនកម្ពុជាឱ្យបាន។

 

កីឡាការិនីរូបស្រស់ វ័យ២០ឆ្នាំរូបនេះ បន្ថែមយ៉ាងមុតមាំថា ការដាក់ក្តីរំពឹងដណ្តើមមេដាយ ដោយសារខ្លួនជឿជាក់ ព្រោះធ្លាប់មានប្រវត្តិប្រកួតនៅក្រៅស្រុកច្រើនលើកមកហើយ ជាពិសេសការចូលរួមប្រកួតកម្រិតអន្តរជាតិ ដែលមានកីឡាការិនីពីបណ្តាប្រទេសផ្សេងៗ មានសមត្ថភាពខ្ពស់ជាបទពិសោធ ក៏ដូចជាមេរៀនសម្រាប់ខ្លួនយកមកកែខៃ៕