តំបន់ប្រើប្រាស់ច្រើនយ៉ាងទួលព័ន្ធតាឡីបឹងស្នេហ៍ ត្រូវ​បាន​បង្កើតឡើងដោយអនុក្រឹត្យកាលពីខែ​កុម្ភៈ ឆ្នាំ២០២១ ដែលមានផ្ទៃដីទំហំ៣៥៥៧ហិកតា។ តំបន់នេះ មានភូមិសាស្ត្រស្ថិតនៅក្រុងព្រៃវែង ស្រុកស្វាយអន្ទរ ស្រុកពាមរក៏ និងស្រុកបាភ្នំ ខេត្តព្រៃវែង។ 

 

 

ក្នុង​ពិធី​សម្ពោធ​ប៉មទស្សនាសត្វស្លាប លោក ចាយ សាមិត្ត រដ្ឋលេខាធិការក្រសួងបរិស្ថាន បាន​លើក​ឡើងថា តំបន់ប្រើប្រាស់ច្រើនយ៉ាងទួលព័ន្ធតាឡីបឹងស្នេហ៍ ជាទីកន្លែងរកចំណី ការរស់នៅ និងបន្តពូជរបស់សត្វស្លាបទឹក។ តំបន់នេះ មាន​សត្វមួយចំនួន​ជា​ប្រភេទជិតផុតពូជ និងកំពុងរងការគំរាមកំហែងលើពិភពលោក ដូចជាប្រភេទ ស្មោញ ទុងប្រផេះ រនាលពណ៌ ត្រយងខ្លួនស ត្រយងខ្លួនរលោង ត្រដក់តូច ជាពិសេសប្រភេទសត្វចង្កៀលខ្យង ដែលកំពុងបន្តពូជពងកូនរាប់ពាន់ក្បាល។
 

រដ្ឋលេខាធិការរូបនេះ​ បន្តថា ក្រសួងបរិស្ថាន កំពុង​សាងសង់ប៉មសម្រាប់មើលសត្វ ចំនួន១០កន្លែង ស្ថិតនៅ​ខេត្តបាត់ដំបង បន្ទាយមានជ័យ ឧត្តរមានជ័យ ព្រៃវែង តាកែវ កំពត កែប និងខេត្ត​កំពង់ចាម។ ប៉មចំនួន៧ ត្រូវបានសាងសង់រួចរាល់ និងប៉មចំនួន៣កន្លែងទៀត កំពុងសាងសង់។
 

បើតាម​ក្រសួងបរិស្ថាន ក្រសួង​បាន​ផ្ដល់​ប៉មទស្សនាសត្វស្លាបជូនដល់តំបន់ការពារធម្មជាតិប្រើប្រាស់ ក្នុងគោលបំណងបម្រើកិច្ចការពារ និងអភិរក្សធនធានធម្មជាតិ។ ជាមួយគ្នានេះ ក៏​ជំរុញឱ្យតំបន់ការពារធម្មជាតិ ក្លាយជាកន្លែងដែលអាចទាក់ទាញទេសចរ ដើម្បីផ្ដល់​ចំណូល​ដល់ប្រជាសហគមន៍ និងជួយដល់សេដ្ឋកិច្ចជាតិ៕

 ប៉មទស្សនាសត្វស្លាបទួលព័ន្ធតាឡីបឹងស្នេហ៍។​ រូបភាពពីក្រសួងបរិស្ថាន