អន្តរជាតិ
ស៊ុយអែត នឹងបញ្ជូនរថក្រោះនិងប្រព័ន្ធកាំភ្លើងធំទៅអ៊ុយក្រែនក្នុងកញ្ចប់ជំនួយយោធាថ្មី កាំភ្លើងធំ Archer របស់ស៊ុយអែត បញ្ជូនទៅអ៊ុយក្រែន។ រូបថតពី Bae System
× រដ្ឋាភិបាលស៊ុយអែត នៅថ្ងៃទី១៩ ខែមករា បានប្រកាសផែនការបញ្ជូនកញ្ចប់ជំនួយយោធាថ្មីទៅអ៊ុយក្រែនរួមបញ្ចូលទាំងរថពាសដែកប្រយុទ្ធសម្រាប់ដឹកទាហានថ្មើរជើង និងប្រព័ន្ធកាំភ្លើងធំ Archer។
កញ្ចប់ជំនួយយោធាពីស៊ុយអែតតម្លៃ៤១៩លានដុល្លារ ក៏រួមមានអាវុធប្រឆាំងរថក្រោះចល័តធុនស្រាល NLAW និងឧបករណ៍បោសសម្អាតមីនដែលនឹងត្រូវបញ្ជូនទៅអ៊ុយក្រែន ខណៈដែលសង្គ្រាមតតាំងជាមួយរុស្ស៊ីអូសបន្លាយជិតមួយឆ្នាំហើយ។
«ជ័យជម្នះរបស់អ៊ុយក្រែនក្នុងសង្គ្រាមនេះគឺមានសារសំខាន់ស្ទើរមិនអាចពិពណ៌នាបាន»។ នាយករដ្ឋមន្ត្រីស៊ុយអែត Ulf Kristersson លើកឡើងក្នុងសន្និសីទកាសែតមួយ ដោយបន្ថែមថា អ៊ុយក្រែនកំពុងប្រយុទ្ធដើម្បីសេរីភាព និងសន្តិសុខរួមរបស់អឺរ៉ុប ហើយនេះជាមូលហេតុចម្បងមួយដែលប្រទេសជាច្រើនកំពុងតែជួយជ្រោមជ្រែងអ៊ុយក្រែនឥឡូវនេះ។
ជាមួយគ្នានេះ ស៊ុយអែតនឹងបញ្ជូនរថពាសដែកប្រយុទ្ធសម្រាប់ដឹកទាហានថ្មើរជើងចំនួន៥០គ្រឿងទៀត។ រថពាសដែកប្រភេទនេះអាចដឹកទាហានថ្មើរជើងរហូតដល់៨នាក់ ហើយវាត្រូវបានបំពាក់កាំភ្លើងកាណុងស្វ័យប្រវត្តិ។ យ៉ាងណាមិញ រដ្ឋាភិបាលស៊ុយអែតមិនបានបញ្ជាក់ច្បាស់ពីចំនួនប្រព័ន្ធកាំភ្លើងធំឡើយដែលផលិតដោយក្រុមហ៊ុន Bofors BAE ឡើយ។
អ៊ុយក្រែនបានបង្ហាញចំណាប់អារម្មណ៍ជាយូរ មកហើយក្នុងការទទួលបានអាវុធប្រភេទទាំថនេះដើម្បីតទល់កងកម្លាំងរុស្ស៊ី។ មុននឹងបញ្ជូនកញ្ចប់ជំនួយខាងលើ ស៊ុយអែតបានប្រកាសពីជំនួយយោធាចំនួន៥ពាន់លានក្រូណាទៅអ៊ុយក្រែន ហើយផ្គត់ផ្គង់តម្រូវការមនុស្សធម៌ថែមទៀត។
បច្ចុប្បន្ន ស៊ុយអែតកាន់តំណែងជាប្រធានសហភាពអឺរ៉ុបប្តូរវេនហើយបានដាក់ពាក្យចូលរួមសម្ព័ន្ធណាតូរួមជាមួយនឹងហ្វាំងឡង់ក្រោយរុស្ស៊ីឈ្លានពានអ៊ុយក្រែនមក។ ប៉ុន្តែនីតិវិធីនៅជាប់គាំងត្រឹមតួកគី និងហុងគ្រី៕
© រក្សាសិទ្ធិដោយ thmeythmey.com