ក្នុងពេលទាបភ្លឺ គ្រោះរញ្ជួយដីកម្រិត៧,៨រ៉ិចទ័រ បានកើតមាននៅភាគខាងត្បូងតួកគី និងភាគខាងជើងស៊ីរី។ ដោយសារកម្រិតរញ្ជួយខ្លាំង វាបានបង្កឱ្យមានការបាក់រលំអគារនៅតំបន់ព្រំដែនប្រទេសទាំងពីរ។ តាមការបញ្ជាក់របស់ទីភ្នាក់ងារអង្កេតភូមិសាស្រ្តអាម៉េរិក ចំណុចរញ្ជួយបានកើតឡើងនៅតំបន់មួយចម្ងាយ៣៣គីឡូម៉ែត្រពីក្រុង Gaziantep និង២៦គីឡូម៉ែត្រពីក្រុង Nurdagi របស់តួកគី។ 

 

តាមទិន្នន័យដែលផ្តល់ឱ្យចុងក្រោយ អ្នកស្លាប់បានកើនដល់ ៥៦៨នាក់ នៅភាគខាងត្បូងតួកគី និងភាគខាងជើងស៊ីរី។ ទន្ទឹមនេះ មនុស្សជាច្រើននាក់ផ្សេងទៀត បានរងរបួស ក្នុងគ្រោះមហន្តរាយដ៏ខ្លាំងនេះ។ 

 

ក្រោយមានហេតុការណ៍នេះ ប្រធានាធិបតីតួកគី បានទូរសព្ទទៅកាន់អភិបាលតំបន់ចំនួន ៨ ដែលរងគ្រោះដោយសារមហន្តរាយ ឱ្យប្រមូលព័ត៌មាន និងបង្កើនកិច្ចខិតខំជួយសង្រ្គោះ។ ពេលនេះ ក្រុមជួយសង្រ្គោះ កំពុងខិតខំ ស្វះស្វែងរកមនុស្ស ដែលនៅមានជីវិត និងបុគ្គល ដែលជាប់ក្នុងអគារ៕