«ក្តាមថ្មកោះកុង» ពីតំបន់ការពារធម្មជាតិព្រៃកោងកាង កំពុងស្ថិតដំណាក់កាលសិក្សានៃការចុះបញ្ជីជាម៉ាកសម្គាល់ភូមិសាស្រ្តទំនិញ។ អ្នកជំនាញពីនាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម និងអង្គការ​កម្មសិទ្ធិបញ្ញា​ពិភពលោក ចាប់ផ្តើមវាយតម្លៃនិងប្រមូលធាតុចូលពីគ្រប់ភាគីពាក់ព័ន្ធ ដើម្បីអនុវត្ត​កិច្ចការងារនេះ។  
 

នាថ្ងៃទី៨កុម្ភៈ មន្ទីរពាណិជ្ជកម្មខេត្តកោះកុង បានរៀបចំ​​សិក្ខាសាលា​ពិគ្រោះ​យោបល់ ស្តីពី​ទស្សនទាន​អត្ថប្រយោជន៍ និង​នីតិវិធី​នៃការ​ចុះបញ្ជី​ម៉ាក​សម្គាល់​ភូមិសាស្ត្រ​ទំនិញ«ក្តាមថ្ម​កោះកុង» ក្រោមវត្តមាន លោក ឈេង សុវណ្ណដា អភិបាលរង​ខេត្ត​កោះកុង, លោក សួន វិជ្ជា ទីប្រឹក្សា​ក្រសួង​ពាណិជ្ជកម្ម និង​ជា​ប្រធាន​នាយកដ្ឋាន​កម្មសិទ្ធិបញ្ញា រួមនឹងលោក Peter Damary ជំនាញការ​អន្តរជាតិនៃ​WIPO​។ នេះ​បើតាម​រដ្ឋបាល​ខេត្ត​កោះកុង។
 

លោក ឈេង សុវណ្ណដា បានលើកឡើងថាខេត្តកោះកុងសម្បូរទៅដោយភោគផលនេសាទ ដូចជា ក្តាមថ្ម បង្គារ មឹក ត្រីសមុទ្រ គ្រំចំពុះទា កាពិ ជាដើម រួមទាំងផលិតផលសក្តានុពលពីវិស័យកសិកម្ម ផងដែរ។ ក្នុងនោះមាន ម្រេច ទុរេន សាវម៉ាវ ផ្លែចេក ទឹកឃ្មុំតំបន់ឆ្នេរ ។ល។ 
 

លោកបានបញ្ជាក់ថា ក្នុងចំណោមផលិតផលទាំងនេះ គឺមានផលិតផលមួយចំនួន ត្រូវបានដាក់បញ្ចូលជាផលិតផលភូមិមួយផលិតផលមួយរបស់ខេត្ត និងត្រូវបានដាក់លក់លើទីផ្សារនៅភ្នំពេញ និងប្រទេសថៃ។​
 

បើតាមលោក សុវណ្ណដា​ ដ្បិតផលនេសាទ និងកសិកម្មទាំងនោះត្រូវបានដាក់លក់នៅទីផ្សារក្នុងស្រុក និងប្រទេសជាប់ព្រំដែនក្តី ប៉ុន្តែអ្នកទិញ ឬអ្នកប្រើប្រាស់ភាគច្រើនមិនទាន់ដឹងពីផលិតផលនោះ មានប្រភពមកពីខេត្តកោះកុងឡើយ។ «នេះជាមូលហេតុ មួយក្នុងចំណោមមូលហេតុផ្សេងទៀត ដែលធ្វើឲ្យអ្នកផលិត និងប្រជាកសិកររបស់យើង មិនទាន់អាចលក់ផលិតផលរបស់ពួកគាត់បានថ្លៃ ខណៈផលិតផលរបស់ពួកគាត់មានគុណភាពមិនចាញ់ផលិតផលមកពីខេត្តផ្សេង ឬប្រទេសជិតខាងនោះឡើយ»។ នេះជាការបញ្ជាក់របស់លោកអភិបាលរងខេត្តកោះកុង។ 
 

ដើម្បីដោះស្រាយបញ្ហានេះ​ រដ្ឋបាលខេត្ត និងក្រសួងពាណិជ្ជកម្ម តាមរយៈមន្ទីរពាណិជ្ជកម្មខេត្ត បានផ្សព្វផ្សាយដល់ផលិតករឱ្យអភិវឌ្ឍផលិតផលរបស់ខ្លួនឱ្យកាន់តែប្រសើរ ដោយការវេចខ្ចប់ប្រកបដោយអនាម័យ, ការដាក់ស្លាកស្របតាមបទដ្ឋានបច្ចេកទេសផលិតផល និងតម្លៃដែលប្រកបដោយភាពប្រកួតប្រជែងនៅលើទីផ្សារ។  

លោក សុវណ្ណដា​ បាននិយាយដូច្នេះ៖ «យើងបានធ្វើការមួយកម្រិតទៀត ក្នុងការត្រៀមចុះបញ្ជីម៉ាកសម្គាល់ភូមិសាស្ត្រទំនិញ«ក្ដាមថ្មកោះកុង»។ ខេត្តកោះកុង នឹងមានមោទកភាពក្រៃលែង ប្រសិនណាបើមានផលិតផលរបស់ខេត្តអាចចុះបញ្ជីម៉ាកសម្គាល់ភូមិសាស្ត្រទំនិញ និងមានឈ្មោះល្បីប្រកបដោយភាជោគជ័យនាពេលដ៏ខ្លីខាងមុខនេះ»។

 

ពាក់ព័ន្ធនឹង «ក្តាមថ្មកោះកុង»នេះ លោក សាលីប ហ្វារីន ប្រធានមន្ទីរពាណិជ្ជកម្មខេត្តកោះកុង បានថ្លែងប្រាប់សារព័ត៌មានថ្មីៗ(ThmeyThmey) នាថ្ងៃទី១០កុម្ភៈថា ​ បច្ចុប្បន្នក្រុមអ្នកជំនាញខាងកម្មសិទ្ធិបញ្ញានៃក្រសួងពាណិជ្ជកម្ម និងអង្គការ​កម្មសិទ្ធិបញ្ញា​ពិភពលោក កំពុងសិក្សានិងប្រមូលព័ត៌មានពីអ្នកនេសាទអ្នកលក់ និងសហគមន៍ សម្រាប់ការចុះបញ្ជីជាម៉ាកសម្គាល់ភូមិសាស្រ្តទំនិញ។  បើតាមលោក ហ្វារីន ដើម្បីសម្រេចនូវកិច្ចការងារនេះ គឺត្រូវទាមទាររយៈមធ្យមណាមួយក្នុងការរៀបចំនីតិវិធីឱ្យត្រឹមត្រូវ។ 

លោក សង្ឃឹមខ្ពស់ថា​៖«ក្តាមថ្មកោះកុង នឹងត្រូវបញ្ជីម៉ាកសម្គាល់ភូមិសាស្រ្តទំនិញ ព្រោះក្តាមយើងមានរសជាតិឆ្ងាញ់។ ហើយលក្ខណៈពិសេសរបស់យើងគឺការនេសាទតាមបែបប្រពៃណី ដូចជាដាក់លប,​ ការជីករក  និងការចូលរួមអភិរក្សពីអ្នកនេសាទក្នុងរដូវក្តាមពងកូនជាដើម»។​
 

​របាយការណ៍​បូកសរុប​លទ្ធផល​ការងារ​ពាណិជ្ជកម្ម​ប្រចាំឆ្នាំ ២០២២ និង​ទិសដៅ​ការងារ​ពាណិជ្ជកម្ម​ឆ្នាំ ២០២៣ របស់​ក្រសួង​ពាណិជ្ជកម្ម បានបង្ហាញថា មាន​ផលិតផល​ក្នុងស្រុក​ចំនួន ៤ កំពុង​ស្ថិត​ក្នុង​ដំណើរ​ការចុះបញ្ជី​ម៉ាក​សម្គាល់​ភូមិសាស្ត្រ។ ក្នុងនោះ​ មានផលិតផល​៣ ស្ថិតក្នុង​ដំណាក់កាល​បញ្ចប់​ការរៀបចំ ខណៈមួយទៀតជា«​ក្ដាមថ្ម​កោះកុង​»នោះ គឺ ស្ថិត​ក្នុង​ដំណាក់កាល​ចាប់ផ្ដើម​រៀបចំ​ចុះបញ្ជី។

 

​​ក្រសួងពាណិជ្ជកម្ម បានបញ្ជាក់ថា ផលិតផល ៣ ដែល​កំពុងស្ថិត​ក្នុងដំណាក់កាល​នៃ​ការបញ្ចប់​ការរៀបចំ​ចុះបញ្ជី​ម៉ាក​សម្គាល់​ភូមិសាស្ត្រ គឺមាន អំបិល​កំពត​កែប​, ​បង្កង​តាកែវ​ និង ​ទឹកត្រី​កំពត​កែប៕