សេចក្ដីថ្លែងការណ៍មួយរបស់សេតវិមានលើកឡើងថា លោកស្រីហារីសបានពិភាក្សាអំពីបញ្ហាប្រឈមដែលបង្កឡើងដោយចិន ជាមួយភាគីបារាំង និងអាល្លឺម៉ង់ រួមទាំងសារសំខាន់នៃការរក្សាសណ្តាប់ធ្នាប់ដោយផ្អែកលើច្បាប់។ 

 

កិច្ចប្រជុំរបស់អនុប្រធានាធិបតីអាមេរិកជាមួយមេដឹកនាំអឺរ៉ុបដែលធ្វើឡើងទន្ទឹមនឹងសន្និសិទសន្តិសុខទីក្រុងMunichបានកើតឡើងចំពេលមានភាពតានតឹងរវាងចិន និងអាមេរិកជុំវិញ ការបាញ់ទម្លាក់បាឡុងចិន។ 

 

ទន្ទឹមនេះ លោកស្រីហារីសបានការពារការចំណាត់ការអាមេរិកចំពោះឧប្បត្តិហេតុបាឡុង និងការបាញ់ទម្លាក់វត្ថុមិនស្គាល់អត្តសញ្ញាណចំនួនបីផ្សេងទៀត។

 

«វាមានតម្រូវការចាំបាច់ត្រូវបាញ់ទម្លាក់ ពីព្រោះយើងមានទំនុកចិត្តថា វាត្រូវបានប្រើប្រាស់ ដោយចិន ដើម្បីឈ្លបយកការណ៍លើប្រជាជនអាមេរិក»។ លោកស្រីហារីសបានប្រាប់ ទូរទស្សន៍ MSNBC បែបនេះ។

 

គួរបញ្ជាក់ បារាំង និងអាល្លឺម៉ង់តែងតែមានជំហរដូចអាម៉េរិកដែលជាសម្ព័ន្ធមិត្តដ៏ជិតស្និទ្ធលើ រឿងទាក់ទងនឹងក្រុងប៉េកាំង។ ក្រៅពីនេះ នៅថ្ងៃដដែលមន្ត្រីសេតវិមានសង្កត់ធ្ងន់ថា អាមេរិក នៅតែរក្សាទំនាក់ទំនងការទូតជាមួយចិនក្រោយហេតុការណ៍បាញ់ទម្លាក់បាឡុងចិន យ៉ាងណាមិញ ទំនាក់ទំនងផ្នែកយោធានៅតែបន្តបិទដដែល៕