ចិន នៅថ្ងៃទី២៤ ខែកុម្ភៈ បានអំពាវនាវឱ្យរុស្ស៊ី និងអ៊ុយក្រែនចាប់ផ្តើមកិច្ចចរចាឡើង នៅក្នុងសេចក្តីថ្លែងការណ៍គោលជំហររបស់ខ្លួន ដែលមានចំនួន១២ចំណុច។ ទន្ទឹមនេះ ចិនក៏បានទទូចឱ្យបោះបង់គំនិតបែបសង្រ្គាមត្រជាក់ និងហាមឃាត់ការប្រើប្រាស់អាវុធនុយក្លេអ៊ែរផងដែរ។
ស្របពេលសង្រ្គាមនៅអ៊ុយក្រែនឈានចូលរយៈពេល ១ឆ្នាំ ចិន បានដាច់ចេញសេចក្តីថ្លែងការណ៍គោលជំហរចំនួន១២ចំណុច លើការដោះស្រាយនយោបាយនៃវិបត្តិនៅអ៊ុយក្រែន។
«ចាប់ផ្តើមកិច្ចចរចាសន្តិភាពឡើងវិញ។ កិច្ចចរចា និងកិច្ចពិភាក្សា ជាដំណោះស្រាយដ៏សំខាន់សម្រាប់វិបត្តិនៅអ៊ុយក្រែន»។ សេចក្តីថ្លែងការណ៍របស់ក្រសួងការបរទេសចិន បានបញ្ជាក់បែបនេះ ដោយបន្ថែមថា រាល់កិច្ចខិតខំក្នុងការដោះស្រាយដោយសន្តិវិធីលើវិបត្តិ ត្រូវតែលើកទឹកចិត្ត និងគាំទ្រ។
ក្នុងសេចក្តីថ្លែងការណ៍ដដែលនេះ ចិន បានបញ្ជាក់ជាថ្មីថា អាវុធនុយក្លេអ៊ែរ មិនត្រូវប្រើប្រាស់ឡើយ ហើយសង្រ្គាមនុយក្លេអ៊ែរ មិនត្រូវឱ្យកើតមាននោះទេ។ ទន្ទឹមនេះ រាល់ការគំរាមកំហែង និងការប្រើប្រាស់អាវុធនុយក្លេអ៊ែរ គួរតែត្រូវបានជំទាស់។ យ៉ាងណាមិញ សេចក្តីថ្លែងការណ៍នេះ មិនបានបញ្ជាក់ពីភាគីណាមួយឱ្យបានច្បាស់លាស់ឡើយ។
កន្លងមក ប្រធានាធិបតីរុស្ស៊ី លោក វ្ល៉ាឌីមៀ ពូទីន បានព្រមានពីការប្រើប្រាស់អាវុធនុយក្លេអ៊ែរ ក្នុងការការពារដែនដីរបស់ខ្លួន ក្នុងនោះរួមទាំងតំបន់ទាំងបួន ដែលបានបញ្ជូនទៅក្នុងរុស្ស៊ី នាពេលកន្លងមកផង។
បន្ថែមពីនេះ ក្រសួងការបរទេសចិន ក៏បានជំរុញឱ្យបណ្តាប្រទេសមួយចំនួនបោះបង់គំនិតបែបសង្រ្គាមត្រជាក់ និងមិនត្រឹមពង្រឹងប្លុកយោធា។ បើតាមរដ្ឋាភិបាលក្រុងប៉េកាំង ភាគីទាំងអស់ គួរតែគោរពចក្ខុវិស័យរួម សហប្រតិបត្តិការ និងសន្តិសុខប្រកបដោយចីរភាព ដើម្បីថែរក្សាស្ថិរភាព និងសន្តិភាពនៅលើពិភពលោករយៈពេលយូរអង្វែង។
ក្រៅពីបញ្ហាខាងលើ ចិនបានជំរុញឱ្យមានការគោរពអធិបតេយ្យប្រទេសទាំងអស់, បញ្ឈប់សកម្មភាពបង្ករឿង, ដោះស្រាយវិបត្តិមនុស្សធម៌, ការពារប្រជាជនស៊ីវិល និងអ្នកទោសសង្រ្គាម, ការការពាររោងចក្រថាមពលដើរដោយនុយក្លេអ៊ែរ, ការសម្របសម្រួលលើការនាំចេញគ្រាប់ធុញ្ញជាតិ, បញ្ឈប់ការដាក់ទណ្ឌកម្មជាឯកតោភាគី, ការការពារច្រវាក់ផលិតកម្មឱ្យមានស្ថិរភាព និងការកសាងប្រទេសក្រោយសង្រ្គាម៕