មិនដល់រយៈពេលមួយសប្តាហ៍ឡើយ ក្រុងព្យុងយ៉ាង បានបាញ់មីស៊ីលរហូតដល់ទៅ ៣លើក ខណៈកូរ៉េខាងត្បូង និងអាម៉េរិកធ្វើសមយុទ្ធយោធាដ៏ធំ ក្នុងរយៈពេល ៥ឆ្នាំចុងក្រោយ។ អគ្គសេនាធិការចម្រុះកូរ៉េខាងត្បូង (JCS) នៅព្រឹកថ្ងៃទី១៦ ខែមីនា ចាប់បានសញ្ញានៃការបាញ់មីស៊ីលនៅតំបន់ Sunan ក្នុងក្រុងព្យុងយ៉ាង។ 

 

មីស៊ីលដែលបាញ់នៅម៉ោងប្រមាណ ៧ និង១០នាទី ហោះបានចម្ងាយប្រមាណ ១ពាន់គីឡូម៉ែត្រ មុននឹងធ្លាក់ទៅក្នុងសមុទ្រ។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។ 

 

យ៉ាងណាមិញ យោធាកូរ៉េខាងត្បូង មិនទាន់ប្រាកដឡើយ ថាមីស៊ីលនោះ ជាមីស៊ីលប្រភេទណា ប៉ុន្តែក្រុងសេអ៊ូលសង្ស័យថា ជាមីស៊ីលបាលីស្ទិកអន្តរទ្វីប (ICBM)។ កូរ៉េខាងជើង បាញ់មីស៊ីលអន្តរទ្វីប Hwasong-15 ចុងក្រោយ ក្នុងខែកុម្ភៈកន្លងទៅ។ 

 

«អាជ្ញាធរចារកិច្ចកូរ៉េខាងត្បូង និងអាម៉េរិក កំពុងដឹកនាំការវិភាគប្រកបដោយគ្រប់ជ្រុងជ្រោយ ពាក់ព័ន្ធនឹងកម្មវិធីអភិវឌ្ឍមីស៊ីលរបស់កូរ៉េខាងជើង»។ អគ្គសេនាធិការចម្រុះកូរ៉េខាងត្បូង បានបញ្ជាក់បែបនេះនៅក្នុងសារទៅកាន់អ្នកសារព័ត៌មាននៅថ្ងៃទី១៦ ខែមីនា។ 

 

ក្រោយពីការបាញ់នេះ ប្រធានសេនាធិការចម្រុះកូរ៉េខាងត្បូង ឧត្តមសេនីយ៍ Kim Seung-kyum បានជជែកតាមប្រព័ន្ធវីដេអូជាមួយឧត្តមសេនីយ៍ Paul LaCamera មេបញ្ជាការនៃបញ្ជាការដ្ឋានកងកម្លាំងអាម៉េរិក-កូរ៉េខាងត្បូង ដើម្បីបញ្ជាក់ពីការពង្រឹងជំហរការពាររួមគ្នាប្រឆាំងនឹងសកម្មភាពអរិភាព និងការគំរាមកំហែងពីសំណាក់កូរ៉េខាងជើង។ 

 

ការបាញ់មីស៊ីលជាលើកទីបី ដែលមានរយៈពេលមិនដល់ ១សប្តាហ៍នេះ ធ្វើឡើងស្របពេលអាម៉េរិក និងកូរ៉េខាងត្បូង កំពុងធ្វើសមយុទ្ធយោធា Freedom Shield 23 ដែលគ្រោងធ្វើឡើងយ៉ាងហោចណាស់ ១០ថ្ងៃ។ 

 

បន្ថែមពីនេះ ការបាញ់មីស៊ីលចម្ងាយឆ្ងាយខាងលើ ធ្វើឡើងមុនប៉ុន្មានម៉ោងប៉ុណ្ណោះនៃជំនួបរវាងលោក យូន សុកយ៉ល ប្រធានាធិបតីកូរ៉េខាងត្បូង និងនាយករដ្ឋមន្រ្តីជប៉ុន លោក គីស៊ីដា ហ្វូមីអូ នៅក្នុងក្រុងតូក្យូ ដើម្បីជជែកពីបញ្ហាកូរ៉េខាងជើង ពាណិជ្ជកម្ម ការរឹតត្បិតលើធាតុកម្រ ការចែករំលែកព័ត៌មានចារកិច្ច និងបញ្ហាការចាប់បង្ខំកម្លាំងពលកម្មក្នុងសម័យសង្រ្គាមជាដើម៕