ប្រសិនគ្មានការប្រែប្រួលទេ ប្រធានាធិបតីចិន លោកស៊ី ជិនភីង នឹងធ្វើទស្សនកិច្ចនៅរុស្ស៊ី ចាប់ពីថ្ងៃទី២០ ដល់ថ្ងៃទី២២ ខែមីនា។ នេះជាទស្សនកិច្ចទៅក្រៅប្រទេសលើកដំបូងរបស់លោកស៊ី ជិនភីង ក្រោយកាន់តំណែងជាប្រធានាធិបតីនៅអាណត្តិទីបី។ 

 

តាមសេចក្តីប្រកាសរបស់វិមានក្រេមឡាំង លោកស៊ី និងជជែកជាមួយសមភាគីរុស្ស៊ី លោកវ្ល៉ាឌីមៀ ពូទីន ជុំវិញការអភិវឌ្ឍទំនាក់ទំនងគ្រប់ជ្រុងជ្រោយបន្ថែម និងទំនាក់ទំនងជាយុទ្ធសាស្រ្តរវាងប្រទេសជិតខាងទាំងពីរ ក៏ដូចជាការផ្តោះប្តូរគំនិតលើការធ្វើឱ្យស៊ីជម្រៅនូវកិច្ចសហប្រតិបត្តិប្រទេសទាំងពីរលើឆាកអន្តរជាតិ។

 

មិនតែប៉ុណ្ណោះ មេដឹកនាំទាំងពីរ គ្រោងចុះហត្ថលេខាលើកិច្ចព្រមព្រៀងទ្វេភាគីផងដែរ។ កិច្ចចរចាសន្តិភាព រួមទាំងទិដ្ឋភាពសង្រ្គាមនៅអ៊ុយក្រែន ក៏អាចត្រូវបានមេដឹកនាំចិនលើកយកមកដែរ។ 

 

ចាប់តាំងពីឡើងកាន់តំណែងជាប្រធានាធិបតីនៅក្នុងឆ្នាំ២០១៣ លោកស៊ី បានជួបលោកពូទីន ដោយផ្ទាល់ក្នុងរយៈពេល ៣៩លើក។ នៅក្នុងខែកុម្ភៈ ឆ្នាំ២០២២ មុនពេលរុស្ស៊ីឈ្លានពានអ៊ុយក្រែន មេដឹកនាំប្រទេសទាំងពីរ បានហៅទំនាក់ទំនងទ្វេភាគីថាគ្មានព្រំដែន។ 

 

កន្លងមក ចិនបានអំពាវនាវឱ្យរដ្ឋាភិបាលក្រុងកៀវ និងក្រុងមូស្គូ ចូលតុចរចាជាមួយគ្នា ដើម្បីស្វែងរកសន្តិភាព។ មិនតែប៉ុណ្ណោះ ក្រុងប៉េកាំង បានរិះគន់ប្រទេសលោកខាងលិច ដែលបន្តបញ្ជូនអាវុធទៅអ៊ុយក្រែន ខណៈខ្លួនបារម្ភពីការរីកសាយនៃជម្លោះ៕