«បេតិកភណ្ឌវប្បធម៌, អេកូទេសចរណ៍,ទេសចរណ៍ឆ្នេរ និងភាពជាខ្មែរ» ជាសសរស្ដម្ភទេសចរណ៍កម្ពុជា

ជាតិ

«បេតិកភណ្ឌវប្បធម៌, អេកូទេសចរណ៍,ទេសចរណ៍ឆ្នេរ និងភាពជាខ្មែរ» ជាសសរស្ដម្ភទេសចរណ៍កម្ពុជា

24, Mar 2023 , 7:59 pm

រូបភាព

«បេតិកភណ្ឌវប្បធម៌, អេកូទេសចរណ៍,ទេសចរណ៍ឆ្នេរ និងភាពជាខ្មែរ» ជាសសរស្ដម្ភទេសចរណ៍កម្ពុជា

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ កម្ពុជា បានកំណត់យក«បេតិកភណ្ឌវប្បធម៌, អេកូទេសចរណ៍,ទេសចរណ៍ឆ្នេរ និងភាពជាខ្មែរ» ជាសសរស្ដម្ភសក្ដានុពលនៃទេសចរណ៍កម្ពុជា ដែលអាចផ្ដល់ជូនទេសចរនូវបទពិសោធន៍ និងភាពប្លែកៗគ្នាជារៀងរាល់ថ្ងៃ។

នៅឆ្នាំ២០២៣នេះ រដ្ឋាភិបាលកម្ពុជា បានអុនម័តលើវិធានការគោលនយោបាយអនុវត្តយុទ្ធនាការ «ឆ្នាំទស្សនាកម្ពុជា ២០២៣»។ យុទ្ធនាការ «ឆ្នាំទស្សនាកម្ពុជា ២០២៣» មានគោលបំណងលើកកម្ពស់កិត្តិនាមទេសចរណ៍ «កម្ពុជា៖ ព្រះរាជាណាចក្រអច្ឆរិយៈ-ផ្ដល់ភាពកក់ក្ដៅ» នៅលើទីផ្សារទេសចរណ៍ឱ្យកាន់តែខ្លាំងក្លា ដើម្បីទាក់ទាញទេសចរអន្តរជាតិឱ្យបានយ៉ាងតិច ៤លាននាក់ នៅឆ្នាំ២០២៣។

ភ្ញៀវទេសចរទៅទស្សនាប្រាសាទអង្គរ

ជាមួយគ្នានេះ យុទ្ធនាការនេះ នឹងផ្សារភ្ជាប់រវាងព្រឹត្តិការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលប្រារព្ធនៅឧសភាខាងមុខនេះ។ ដើម្បីឱ្យយុទ្ធនាការនេះ ទទួលបានជោគជ័យ រដ្ឋាភិបាលកម្ពុជា បានដាក់ចេញនូវវិធានការមួយចំនួន ក្នុងនោះវិធានការទី៣ នឹងរៀបចំដាក់ចេញផ្លូវទស្សនាចរណ៍កម្ពុជាចំនួន ៤។

ផ្លូវទស្សនាចរណ៍ទាំងនោះរួមមាន ផ្លូវទស្សនាចរណ៍ទៅកាន់តំបន់បេតិកភណ្ឌដ៏អស្ចារ្យ, ផ្លូវទស្សនាចរណ៍ទៅកាន់ពិភពធម្មជាតិ, ផ្លូវទស្សនាចរណ៍ទៅកាន់ភាពរីករាយ និងផ្លូវទស្សនាចរណ៍ស្វែងយល់ពីភាពជាខ្មែរ។ ផ្លូវទស្សនាចរណ៍ទៅកាន់តំបន់បេតិកភណ្ឌដ៏អស្ចារ្យ សំដៅដល់ខ្សែទស្សនាចរណ៍ភ្ជាប់តំបន់បេតិកភណ្ឌពិភពលោកសៀមរាប-អង្គរ ព្រះវិហារ សំបូរព្រៃគុក និងតំបន់ជុំវិញដែលសម្បូរដោយរមណីយដ្ឋានប្រវត្តិសាស្រ្ត។

ឆ្នេរសមុទ្រនាខេត្តព្រះសីហនុ

ចំណែក ផ្លូវទស្សនាចរណ៍ទៅកាន់ពិភពធម្មជាតិ សំដៅដល់ខ្សែទស្សនាចរណ៍គោលដៅអេកូទេសចរណ៍ដែលមានតំបន់ភូមិភាគឦសាន និងតំបន់បឹងទន្លេសាប មានខេត្តមណ្ឌលគិរី ភ្ជាប់ជាមួយខេត្តរតនគិរី ក្រចេះ និងស្ទឹងត្រែង។ ផ្លូវទស្សនាចរណ៍ទៅកាន់ពិភពធម្មជាតិ ក៏ជំរុញខ្សែទស្សនាចរណ៍សត្វផ្សោតទន្លេមេគង្គ និងខ្សែទស្សនាចរណ៍តាមដងទន្លេមេគង្គ។

ដោយឡែក ផ្លូវទស្សនាចរណ៍ទៅកាន់ភាពរីករាយវិញ សំដៅដល់ខ្សែទស្សនាចរណ៍ឆ្នេរសមុទ្រកម្ពុជាតភ្ជាប់ខេត្តទាំង៤ នៃតំបន់ឆ្នេរ និងកោះនានា ស្របតាមការប្រសិទ្ធនាម «តារារះទិសនារតី»។ រីឯ ផ្លូវទស្សនាចរណ៍ស្វែងយល់ពីភាពជាខ្មែរ សំដៅដល់ការផ្ដល់ជូននូវបទពិសោធន៍ដ៏វិសេស តាមរយៈអច្ឆរិយភាពរបស់ខ្មែរ និងប្រជាជន។ ខ្សែទស្សនាចរណ៍នេះ នឹងបង្ហាញជូននូវសកម្មភាពសិល្បៈ ក្បាច់គុណបុរាណខ្មែរ វប្បធម៌ ប្រពៃណីដែលមានអាយុកាលយូរលង់ និងកម្មវិធីបុណ្យ ឬព្រឹត្តិការណ៍ប្រចាំតំបន់ ទំនៀមទម្លាប់ របៀបរស់នៅប្រចាំថ្ងៃ ពិសេសម្ហូបអាហារខ្មែរ។

សូមបញ្ជាក់ថា ក្រៅពីបង្កើតផ្លូវទស្សនាចរណ៍ទាំង៤ ក្រសួងទេសចរណ៍ នឹងរៀបចំផែនទីទេសចរណ៍ ដោយបង្ហាញបទពិសោធន៍ សម្បទាទេសចរណ៍ សេវាកម្ម និងសកម្មភាពកម្សាន្តផ្សេងៗ។ នេះបើតាមវិធានការគោលនយោបាយអនុវត្តយុទ្ធនាការ «ឆ្នាំទស្សនាកម្ពុជា ២០២៣»៕