បុរសម្នាក់បានស្លាប់ និងម្នាក់ទៀតរងរបួស ដោយសារបដាកាត់ទទឹងផ្លូវ ត្រង់ចំណុចស្តុបសណ្ឋាគារស្មាយលីង (ផ្លូវជាតិលេខ៦ កែងផ្លូវ៦០ម៉ែត្រ) ក្នុងក្រុងសៀមរាប បានបាក់ធ្លាក់សង្កត់ចំពីលើ ខណៈដែលខ្យល់កន្ត្រាក់ បានបោកបក់ខ្លាំងចាប់ពីវេលាម៉ោង៥ល្ងាចថ្ងៃទី២៩ ខែមីនា នេះ។

 

លោក តេង ច័ន្ទណាត ស្នងការនគរបាលខេត្ត និងលោក លី វណ្ណៈ នាយករដ្ឋបាលខេត្ត សុទ្ធតែបានអះអាងប្រាប់សារព័ត៌មានថ្មីៗ ក្រោយហេតុការណ៍នេះ ថា ក្រុងសៀមរាបទាំងមូលរងគ្រោះដោយសារតែការបក់បោកខ្យល់កន្ត្រាក់។ «អ្នកស្លាប់ជាគឺជាបុរសម្នាក់ដែលបានជិះម៉ូតូ ចំពេលដែលផ្ទាំងបដាបានបាក់ធ្លាក់»។ នេះជាការបញ្ជាក់របស់លោក តេង ច័ន្ទណាត។

 

លោក លី វណ្ណៈ បានបន្ថែមថា ទីតាំងតុបតែងនានា ក្នុងនោះវេទិកានៅម្តុំស្ពានរាជដំណាក់ខេត្ត សុទ្ធតែរងគ្រោះខូចខាត ដោយសារខ្យល់។ អ្នករងគ្រោះពីរនាក់ ត្រូវបានបញ្ជូនភ្លាមទៅមន្ទីរពេទ្យខេត្ត ប៉ុន្តែគួរឱ្យសោកស្តាយ ម្នាក់បានទទួលមរណភាព៕