បន្ទាប់ពីបញ្ចប់ការប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍ លើកទី៦ ឆ្នាំ២០២៣ នៅប្រទេសកម្ពុជា បានត្រឹមតែមួយសប្តាហ៍ប៉ុណ្ណោះ សហព័ន្ធកីឡាវ៉ូវីណាមកម្ពុជា បានបញ្ជូនអត្តពលិកកម្ពុជា ទៅបោះជំរំហ្វឹកហាត់នៅប្រទេសវៀតណាម ដើម្បីសម្រេចគោលដៅក្នុងការប្រជែងមេដាយនាព្រឹត្តិការណ៍ប្រកួតកីឡាស៊ីហ្គេម ឆ្នាំ២០២៣ ដែលនឹងប្រព្រឹត្តទៅនាខែឧសភា ខាងមុខ។

 

 

ទៅហ្វឹកហាត់នៅវៀតណាមនេះ មានប្រតិភូគ្រូបង្វឹកចំនួន៤រូប កីឡាករ១៦រូប និងកីឡាការិនី១១រូប ដែលត្រូវហ្វឹកហាត់លើវិញ្ញាសាមេគុនសម្តែង និងវិញ្ញាសាប្រយុទ្ធ។ មន្រ្តីសហព័ន្ធកីឡាវ៉ូវីណាមបានផ្តល់បទសម្ភាសដល់សារព័ត៌មានថ្មីៗ តាមសារអេឡិចត្រូនិក ថាការចេញទៅហ្វឹកហាត់នេះ ដើម្បីពង្រឹងលើសមត្ថភាពដែលមានចំណុចខ្វះខាត។

 

លោក យ៉ាំ ថៃសាន អគ្គលេខាធិការសហព័ន្ធកីឡាវ៉ូវីណាម និយាយថា៖«យើងសល់ពេលមួយខែគត់ ដើម្បីបង្កើនបច្ចេកទេស និងសមត្ថភាពរបស់កីឡាករ-កីឡាការិនីត្រៀមស៊ីហ្គេម២០២៣ ក្រោយប្រកួតជើងឯកអាស៊ីអាគ្នេយ៍ចប់ ដែលយើងឃើញនៅមានចំនុចដែលត្រូវពង្រឹងបន្ថែម ទាំងកម្លាំង និងបច្ចេកទេស នៃវិញ្ញាសាមួយចំនួន»។

 

គួរំឮកផងដែរថា សហព័ន្ធកីឡាវ៉ូវីណាមកម្ពុជា កំណត់គោលដៅប្រជែងយកមេដាយមាសយ៉ាងតិច៩ ក្នុងការប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលនឹងប្រព្រឹត្តទៅនាខែឧសភា ខាងមុខ៕