សន្និបាតដំបូងរបស់ក្រុមអ្នកផលិត និងអាជីវករនំបញ្ចុកសៀមរាប ត្រូវបានរៀបចំឡើងនៅថ្ងៃទី៤ មេសា នៅបរិវេណសាលាឃុំព្រះដាក់។ ក្នុងសន្និបាតនេះ ក៏មានការជ្រើសរើសប្រធាន អនុប្រធានគណៈកម្មាធិការប្រតិបត្តិ នៃក្រុមអ្នកផលិត និងអាជីវករនំបញ្ចុកសៀមរាបផងដែរ។

 

លោក សួន វិជ្ជា ប្រធានលេខាធិការដ្ឋាន នៃគណៈកម្មការជាតិគ្រប់គ្រងកម្មសិទ្ធិបញ្ញា និងជាប្រធាន​នាយដ្ឋានកម្មសិទ្ធិបញ្ញា បានឱ្យដឹងថា នំបញ្ចុកព្រះដាក់មានភាពល្បីល្បាញយូរមកហើយ ហើយការចុះបញ្ជីកម្មសិទ្ធិបញ្ញានៅពេលនេះ នឹងជួយបង្កើនកេរ្តិ៍ឈ្មោះផលិតផលនេះ កាន់តែល្បីល្បាញ មួយកម្រិតទៀត។ 

 

មន្រ្តីដដែល ស្នើឱ្យពលរដ្ឋ ពិសេសអ្នកផលិតនំបញ្ចុកទាំងអស់ ​ចូលរួម​ប្រើប្រាស់​កម្មសិទ្ធិបញ្ញា ​តាមរយៈការចុះបញ្ជីម៉ាក​សមូហភាព ដើម្បីលើកកម្ពស់ផលិតផលរបស់ខ្លួន ដោយប្រើប្រាស់ឡូហ្គោ ជាសញ្ញាសម្គាល់ បិទនៅកន្លែងលក់នំបញ្ចុកជាដើម។ 

 

លោក ថន ថោន ដែលអ្នកលក់នំបញ្ចុកមួយរូបនៅភូមិព្រះដាក់ យល់ថា ការចុះបញ្ជីម៉ាកសមូហភាព កម្មសិទ្ធិបញ្ញានំបញ្ចុកសៀមរាបនៅពេលនេះ នឹងជំរុញឱ្យសាធារណស្គាល់នំបញ្ចុកព្រះដាក់កាន់ច្រើន។ លោកបន្ថែមថា៖« កន្លងមកនំបញ្ចុកព្រះដាក់គេស្គាល់ច្រើន តែមិនទាន់ទូលំទូលាយដល់ប្រទេសក្រៅ ការធ្វើយីហោអ៊ីចឹងសប្បាយចិត្ត និងរំពឹងថាវាកាន់តែល្បីល្បាញ»៕