ជាតិ
រដ្ឋមន្រ្តីកសិកម្ម ស្នើឱ្យភាគីឆែកបញ្ជូនគ្រូបច្ចេកទេស និងភាសាអង់គ្លេស មកអភិវឌ្ឍន៍កសិកម្មនៅកម្ពុជា
លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ (ខាងស្ដាំដៃ) និងលោក Martin V´avra ឯកអគ្គរដ្ឋទូតនៃសាធារណរដ្ឋឆែកប្រចាំកម្ពុជា (ខាងឆ្វេងដៃ)។ រូបភាពពីហ្វេសប៊ុកក្រសួងកសិកម្ម រុក្ខាប្រមាញ់ និងនេសាទ
×![]()
ភ្នំពេញ៖ លោក ឌិត ទីណា រដ្ឋមន្រ្តីក្រសួងកសិកម្ម បានស្នើឱ្យភាគីឆែកបញ្ជូនគ្រូ ទាំងផ្នែកបច្ចេកទេស និងភាសាអង់គ្លេស ដើម្បីជួយបណ្តុះបណ្តាលធនធានមនុស្ស និងចូលរួមចំណែកអភិវឌ្ឍន៍វិស័យកសិកម្មនៅកម្ពុជា។ ការស្នើនេះ ធ្វើឡើងក្នុងជំនួបរវាងឯកអគ្គរដ្ឋទូតនៃសាធារណរដ្ឋឆែកប្រចាំកម្ពុជា និងលោក ឌិត ទីណា រដ្ឋមន្រ្តីក្រសួងកសិកម្ម កាលពីថ្ងៃទី៦ មេសា។
លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានជួបជាមួយលោក Martin V´avra ឯកអគ្គរដ្ឋទូតនៃសាធារណរដ្ឋឆែកប្រចាំកម្ពុជា ដើម្បីពិភាក្សាពាក់ព័ន្ធនឹងកសិកម្មរវាងប្រទេសទាំងពីរ។ ក្នុងជំនួបខាងលើ ភាគីកម្ពុជា និងឆែក បានបង្ហាញជំហរបន្តកិច្ចសហប្រតិបត្តិការ និងការធ្វើការងារជាមួយគ្នាបន្តទៀតលើការផ្ទេរបច្ចេកវិទ្យាមេកានិច និងថាមពល។ ទន្ទឹមនឹងនឹង កម្ពុជាត្រូវការនាំចេញផលិតផលកសិកម្មជាច្រើន ដែលទាមទារឱ្យមានការសម្របសម្រួល និងជំរុញពាណិជ្ជកម្មពីសាធារណរដ្ឋឆែក។
ថ្នាក់ដឹកនាំក្រសួងកសិកម្ម និងភាគីសាធារណរដ្ឋឆែក។ រូបភាពពីហ្វេសប៊ុកក្រសួងកសិកម្ម រុក្ខាប្រមាញ់ និងនេសាទ
រដ្ឋមន្ត្រីកសិកម្ម លើកឡើងដូច្នេះ៖«ទីផ្សារ គឺជាអាទិភាពដែលភាគីទាំងពីរត្រូវពិភាក្សាគ្នា ការផ្ទេរបច្ចេកវិទ្យាគ្រឿងម៉ាស៊ីនសម្រាប់វិស័យកសិកម្ម គ្រឿងម៉ាស៊ីនមានគុណភាព និងការអភិវឌ្ឍធនធានមនុស្សក្នុងវិស័យកសិកម្មឱ្យមានគុណភាពរួមទាំងគ្រូបណ្តុះបណ្តាល និងវិស្វករ»។ នេះបើតាមហ្វេសប៊ុកក្រសួងកសិកម្ម។
ដើម្បីរួមចំណែកអភិវឌ្ឍន៍វិស័យកសិកម្មនៅកម្ពុជា លោក ឌិត ទីណា បានស្នើឱ្យភាគីឆែកបញ្ជូនគ្រូមកកម្ពុជាទាំងផ្នែកបច្ចេកទេស និងភាសាអង់គ្លេស ដោយសារគ្រូម្នាក់អាចជួយបណ្តុះបណ្តាលធនធានមនុស្សបានច្រើននាក់។ បន្ថែមលើនេះ លោក បន្តស្នើឱ្យមានការជួបពិភាក្សាជាមួយដៃគូអភិវឌ្ឍ ដើម្បីចែករំលែកពីសក្តានុពលនៃវិស័យកសិកម្មនៅកម្ពុជាផងដែរ៕
Tag:
កសិកម្ម
ឌិត ទីណា
ឆែក
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
